चितवन । भदौ १२ गतेदेखि प्रदर्शनमा आउन लागेको नेपाली चलचित्र ‘पार्वती’को चितवनस्थित म्याङ्गो जनज्योति हलमा पब्लिक प्रिमियर सम्पन्न भएको छ। मंगलबार आयोजित प्रिमियरमा चलचित्रका मुख्य कलाकार नीता ढुङ्गाना र अशोक दर्जी क्यारेक्टर लुकमै उपस्थित भएका थिए।
पर्दामा देखिएको पात्रको लुक्स कलाकारलाई प्रत्यक्ष देख्दा दर्शक उत्साहित देखिएका थिए। चलचित्र हेरेपछि अधिकांश दर्शक भावुक बनेका थिए। कतिपय दर्शकका आँखामा आँसु देखिन्थ्यो भने धेरैले चलचित्रको कथा आफ्नै घर–परिवारसँग जोडिएको प्रतिक्रिया दिएका थिए।
अटिजम भएकी महिला र उनका भाइबीचको आत्मीयता, माया तथा सामाजिक संघर्षलाई चलचित्रले मुख्य विषय बनाएको छ। परिवार र समाजबाट दिदीले भोग्नुपरेको व्यवहारका बीच भाइले देखाउने माया, साथ र समर्पणले दर्शकको मन छोएको निर्देशक तथा कथाकार नीता ढुङ्गानाले बताइन्।
प्रिमियरमा दर्शकबाट सकारात्मक प्रतिक्रिया पाएपछि निर्माण टिम उत्साहित देखिएको छ। प्रिमियरपछि सञ्चारकर्मीसँग कुरा गर्दै निर्देशक तथा अभिनेत्री ढुङ्गानाले आफ्नो निर्देशनमा बनेको चलचित्रलाई दर्शकले मन पराएकोमा खुसी व्यक्त गरिन्।
चलचित्र प्रदर्शनको पूर्वसन्ध्यामा प्रचारप्रसारका लागि निर्माण टिम तथा कलाकार देशका विभिन्न सहरमा पुगेका छन्। सोही क्रममा चितवन पुगेको टोलीले ‘पार्वती’ले दर्शकलाई फरक स्वाद दिने विश्वास व्यक्त गरेको छ।
प्रचारका क्रममा बालगायक तथा अभिनेता अशोक दर्जीले चलचित्रमा काम गर्दाको अनुभव सुनाउँदै ‘पार्वती’ सामाजिक विषयमा आधारित चलचित्र भएकाले सबैलाई हेर्न आग्रह गरे। चलचित्रमा नीता ढुङ्गाना दिदी र अशोक दर्जी भाइको भूमिकामा छन्।
नीता ढुङ्गानाको कथा तथा निर्देशन र हरिहर अधिकारीको निर्माण रहेको चलचित्रमा नीता र अशोकसँगै दीपाश्री निरौला, सिरु विष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेललगायत कलाकारको अभिनय रहेको छ।
‘पार्वती’ शुक्रबारदेखि देशभरका सिनेमा हलमा प्रदर्शनमा आउनेछ। अब हलमा पुगेपछि चलचित्रले दर्शकबाट कस्तो प्रतिक्रिया पाउनेछ भन्ने प्रतिक्षाको विषय बनेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.