पल अहिले ‘यानीमाया’को काममा व्यस्त छन् । दशैंमा रोहित अधिकारी तथा दीपकराज गिरी–दीपाश्री निरौलाको सहकार्यमा निर्माण भएको ‘छ माया छपक्कै २’ प्रदर्शनमा आएपछि पलको ‘यानीमाया’को छायांकन पनि सकिनेछ । त्यसलगत्तै औपचारिक सम्झौता गरेर पुसको पहिलो साताबाट पलसँग नयाँ फिल्मको छायांकन सुरु गर्ने तयारी रोहितको छ ।

नयाँ फिल्ममा पलको जोडीका रूपमा अभिनेत्रीको खोजी भइरहेको छ । यद्यपि, ‘फर्की फर्की’मा अनमोल र जसिताको जोडी सफल भएकाले नयाँ फिल्ममा पनि जसितालाई पलको जोडीका रूपमा प्रस्तुत गर्ने सम्भावनालाई नकारिएको छैन ।

यसरी हेर्दा रोहित अधिकारी पछिल्लो समय नेपाली फिल्मका दुई लोकप्रिय स्टार—अनमोल केसी र पल शाहलाई लगातार आफ्नो फिल्ममा जोड्ने निर्माताका रूपमा अघि बढिरहेका छन् । उनको तयारीअनुसार पहिले पल शाहलाई लिएर नयाँ फिल्म निर्माण हुनेछ भने त्यसपछि अनमोल केसीलाई लिएर ‘फर्की फर्कीः बियोन्ड टाइम’ निर्माण हुनेछ ।

स्टार कलाकार, चर्चित निर्देशक र सफल फ्रेन्चाइजको सिक्वेललाई प्राथमिकतामा राखेर अघि बढाइएको रोहितको यो योजनाले उनको आगामी फिल्म यात्रालाई थप महत्वाकांक्षी बनाएको छ । ‘गाजलु’, ‘छ माया छपक्कै’, ‘फर्की फर्की’, ‘माइतीघर’ र ‘छ माया छपक्कै २’ हुँदै अब पल र अनमोललाई लिएर निर्माण हुने दुई नयाँ फिल्मले रोहितको व्यावसायिक निर्माताका रूपमा यात्रालाई थप बलियो बनाउने अपेक्षा गरिएको छ ।