‘अक्षरा’को प्रदर्शन मिति सर्‍यो, अब मंसिर २४ गतेदेखि हलमा

नमस्ते चितवन

बुधबार, भदौ २४, २०८३ मा प्रकाशित

काठमाडौं । क्षीत बाबु प्रोडक्सन हाउसको ब्यानरमा निर्माण भएको फिल्म ‘अक्षरा’को प्रदर्शन मिति परिवर्तन गरिएको छ। यसअघि भदौ २६ गतेदेखि प्रदर्शनमा आउने भनिएको फिल्म अब मंसिर २४ गतेदेखि देशभरका सिनेमा हलमा प्रदर्शन हुने भएको छ।

निर्माताद्वय उग्रसेन ढुङ्गाना र सुग्रसेन ढुङ्गानाले जारी गरेको विज्ञप्तिमा रसुवामा आएको बाढी–पहिरो तथा पछिल्लो परिस्थितिलाई मध्यनजर गर्दै प्रदर्शन मिति परिवर्तन गरिएको जनाइएको छ।

मिति परिवर्तनका कारण दर्शक, सिनेमा हल व्यवसायी तथा फिल्मसँग प्रत्यक्ष र अप्रत्यक्ष रूपमा जोडिएका सबैमा पर्न गएको असुविधाप्रति निर्माण पक्षले क्षमायाचना गरेको छ। नयाँ प्रदर्शन मितिमा पनि दर्शकको माया, साथ र सहयोग निरन्तर प्राप्त हुने विश्वास निर्माण पक्षले व्यक्त गरेको छ।

यसअघि फिल्मले मंगलबार मात्रै केन्द्रीय चलचित्र जाँच समिति (सेन्सर बोर्ड)बाट युनिभर्सल सर्टिफिकेट प्राप्त गरेको थियो। युनिभर्सल सर्टिफिकेट पाएसँगै फिल्म सबै उमेर समूहका दर्शकले हेर्न पाउने भएको थियो।

फिल्मलाई विनयराज पौडेलले निर्देशन गरेका हुन्। यो उनको डेब्यु निर्देशकीय फिल्म हो। फिल्ममा न्यान्सी खड्का, सुशील सिटौला, सुशील पोखरेल, अंशु महर्जन, पुष्कर राउत, रिस्ता अधिकारी, उत्तम केसी, गीता अधिकारी, वीरेन्द्र कुशवाह, सृजना अधिकारी, मोहन अधिकारी, सुमन ज्योति न्यौपाने (ल्याग्री दादा) र सृष्टि खड्काको अभिनय रहेको छ। बालकलाकारका रूपमा रोनक खड्का र प्रीसा ढुङ्गाना छन्।

उग्रसेन ढुङ्गाना र सुग्रसेन ढुङ्गाना निर्माता रहेको फिल्मका कार्यकारी निर्माता सुरज थापाकाजी र सुमन ज्योति न्यौपाने हुन्। फिल्मको कथा निर्माता उग्रसेन ढुङ्गानाले लेखेका हुन् भने पटकथा तथा संवाद अभिमन्यु निरवी र निर्देशक पौडेलले संयुक्त रूपमा तयार पारेका हुन्।

सोनी थापा (ढुङ्गाना) प्रस्तुतकर्ता रहेको फिल्मको छायांकन दिपेन बस्न्यातले गरेका हुन् भने सम्पादन गौतम खड्काको छ।

फिल्मको वितरण नेसनल सिने ग्रुप नेपालका तर्फबाट दीपक दंगालले गर्नेछन् भने डिजिटल अधिकार ओएसआर डिजिटलले खरिद गरेको छ।

निर्माण पक्षले नयाँ प्रदर्शन मितिमा फिल्मलाई दर्शकले उत्तिकै माया र साथ दिने अपेक्षा गरेको छ।