‘सबैभन्दा पहिला बधाई नीतालाई। एकदमै गाह्रो विषय र समाजमा घटिरहने कुराहरू फिल्मको पर्दामा थियो,’ उनले भनिन्, ‘फरक क्षमता भएको घरमा घटिरहने घटना र आमा–बुबा साथमा भए पनि समाजले कस्तो भूमिका खेल्दो रहेछ भन्ने कुराले मलाई निकै छोएको थियो।’

संविधानविद् तथा वरिष्ठ अधिवक्ता भीमार्जुन आचार्य पनि चलचित्र हेरेपछि भावुक देखिए। उनले नीताको अभिनयको प्रशंसा गर्दै आफूले यस्तो स्तरको अभिनय कमै देखेको बताए।

‘यो फिल्ममा नीता ढुङ्गानाले जुन अभिनय गर्नुभएको छ, यो लेभलको एक्टिङ मैले देखेकै छैन,’ उनले भने, ‘यस्तो फिल्मको सन्देश एकदमै महत्त्वपूर्ण छ। किनभने यो विषयवस्तु रोज्नु टिमका लागि जोखिम थियो।’

हास्यकलाकार किरण केसी ‘रातामकै’ले चलचित्रको कथावस्तु र निर्देशन दुवै बलियो रहेको बताए। उनले नीताले आफूलाई नै निर्देशन गर्दै पात्रमा पूर्ण रूपमा डुबेर दर्शकलाई भावुक बनाउन सफल भएको प्रतिक्रिया दिए।

‘यो फिल्मको कथावस्तु नै एकदमै बलियो छ। निर्देशन पक्ष पनि एकदमै बलियो लाग्यो। नीताले आफैंलाई निर्देशन गरेर त्यो पात्रको ट्र्याकमा दर्शकलाई समातेर सेकेन्ड–सेकेन्डमा रुवाउन सक्ने क्षमता देखाएकी छन्,’ उनले भने।

किरण केसीले चलचित्रको प्रशंसा गर्दै आफूमा त्यस्तो शक्ति भएको भए अन्तर्राष्ट्रिय अवार्डका लागि पठाउन सक्ने समेत बताए।

चलचित्र हेर्न अभिनेता जितु नेपाल, सञ्चारकर्मी प्रकाश सुवेदी, नरेश भट्टराईलगायत पनि पुगेका थिए। उनीहरूले समेत चलचित्रको प्रशंसा गरेका छन्।

भदौ १२ गतेदेखि प्रदर्शनमा आएको ‘पार्वती’मा नीता ढुङ्गाना र अशोक दर्जी मुख्य भूमिकामा छन्। अटिजम भएकी दिदी र भाइबीचको भावनात्मक सम्बन्धलाई चलचित्रको कथाको केन्द्रमा राखिएको छ। अटिजम भएकी छोरीलाई समाजले हेर्ने दृष्टिकोण तथा उनका अभिभावकले भोग्नुपर्ने सामाजिक चुनौतीलाई चलचित्रमा प्रस्तुत गरिएको छ।

चलचित्रमा नीता र अशोकसँगै दीपाश्री निरौला, सिरु विष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेल, दिप्त प्रकाश अधिकारीलगायतको अभिनय छ।

निर्देशक ढुङ्गानाकै कथा तथा पटकथा रहेको चलचित्रको स्क्रिप्ट शिवम् अधिकारीले लेखेका हुन्। सुदीप बरालको छायांकन रहेको चलचित्रमा रामजी लामिछानेले नृत्य निर्देशन गरेका छन्।

चलचित्रका प्रोडक्सन म्यानेजर तथा कार्यकारी निर्माता शंकर पाण्डे हुन् भने निर्माता हरिहर अधिकारी रहेका छन्।