काठमाडौँ । नेपालमा दर्शकको राम्रो साथ पाएको नेपाली चलचित्र ‘पार्वती’ले अमेरिकामा पनि उत्साहजनक सुरुवात गरेको छ। गत शुक्रबारदेखि अमेरिकाका विभिन्न सहरमा प्रदर्शनमा आएको चलचित्रका सुरुवाती तीन दिनका शो हाउसफुल भएका छन्।
‘द माया डिजिटल युएसए’ले वितरण गरेको चलचित्रले प्रदर्शनको पहिलो दिनदेखि नै नेपाली दर्शकको उल्लेखनीय साथ पाएको हो। सेप्टेम्बर ११ देखि अमेरिकाका विभिन्न सहरका हलमा चलचित्र प्रदर्शन भइरहेको छ।
सिनेमार्क टिनसल्टोन रोचेस्टरमा साँझ ६ बजे, मार्कस पिकरिङटन सिनेमामा साँझ ६ः२० बजे, एप्पल सिनेमाज ह्वाइट प्लेन्समा साँझ ६ः३० बजे तथा सिनेमार्क कुयाहोगा फल्स एन्ड एक्सडीमा दिउँसो १ः२५ बजे चलचित्रका शो सञ्चालन भइरहेका छन्।
हलमा पुगेका नेपाली दर्शकले चलचित्रको कथावस्तुसँगै मुख्य अभिनेत्री नीता ढुङ्गाना र बालकलाकार अशोक दर्जीको अभिनयको प्रशंसा गरेका छन्।
विदेशमा रहेका नेपाली दर्शकबाट प्राप्त सकारात्मक प्रतिक्रियाले अभिनेत्री तथा निर्देशक नीता ढुङ्गाना उत्साहित छिन्। “मनदेखि बनाएको र फरक विषयवस्तुमा आधारित चलचित्रलाई दर्शकले रुचाउनुभएको छ। आगामी दिनमा पनि यस्तै साथ पाउने आशा छ,” उनले भनिन्।
हरिहर अधिकारी निर्माता र शंकर पाण्डे कार्यकारी निर्माता रहेको चलचित्रको कथा निर्देशक स्वयं नीता ढुङ्गानाले लेखेकी हुन् भने पटकथा शिवम् अधिकारीको रहेको छ।
चलचित्रमा नीता र अशोकसँगै दीपाश्री निरौला, राज पंगेनी, दीप्त प्रकाश अधिकारी, सिरु बिष्ट, आशा पौडेल, सुवास गजुरेल, राधिका कँडेल र राजेन्द्र नेपालीलगायत कलाकारको अभिनय छ।
सुदीप बरालको छायाङ्कन, रामजी लामिछानेको नृत्य निर्देशन तथा साहिल खानको सम्पादन रहेको चलचित्रका ‘तुनाको रेल’ र ‘दिदी भाइ’ बोलका गीत प्रदर्शनअघि नै चर्चामा आएका थिए।
नेपालमा एफडी कम्पनी, एप्पल इन्टरटेनमेन्ट र रिच इन्टरटेनमेन्टले वितरण गरेको चलचित्रको डिजिटल अधिकार ओएसआर डिजिटलले खरिद गरेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.