काठमाडौं । नेपाली चलचित्रका लागि शुक्रबार नयाँ फिल्मको प्रदर्शनसँगै हलमा प्रतिस्पर्धा थपिएको छ। शुक्रबारदेखि ‘झिँगे दाउ–२’, ‘कार्की साइँला’ र ‘माया बस्छ कि के हो !’ एकसाथ प्रदर्शनमा आएका छन्।
तीनवटै फिल्मले फरक–फरक कथावस्तु बोकेका छन्। पारिवारिक तथा सामाजिक कथामा निर्माण भएको ‘झिँगे दाउ–२’लाई ज्ञानेन्द्र देउजाले निर्देशन गरेका हुन्। फिल्ममा केकी अधिकारी, आँचल शर्मा, महेश त्रिपाठी, कुशल विष्टलगायत कलाकारको अभिनय रहेको छ।
‘झिँगे दाउ–२’को प्रदर्शनअघि काठमाडौंमा प्रिमियरसमेत गरिएको थियो। प्रिमियरमा सहभागी दर्शक तथा चलचित्रकर्मीबाट फिल्मले सकारात्मक प्रतिक्रिया पाएको निर्माण पक्षले जनाएको थियो। फिल्मको अग्रिम टिकट बुकिङसमेत खुलाइएको थियो।
यस्तै, जितु नेपाल र प्रियना आचार्यको मुख्य भूमिका रहेको ‘कार्की साइँला’ पनि शुक्रबारबाट हलमा आएको छ। फिल्मले ग्रामीण परिवेश, पारिवारिक सम्बन्ध र भरियाको जीवनसँग जोडिएका विषयलाई कथाको आधार बनाएको छ।
राजेन्द्र बस्नेतको निर्देशनमा बनेको ‘कार्की साइँला’मा जितु नेपाल फरक भूमिकामा प्रस्तुत भएका छन्। फिल्ममा सामाजिक तथा पारिवारिक सम्बन्धसँगै पात्रहरूले भोग्ने संघर्षलाई प्रस्तुत गरिएको निर्माण पक्षले जनाएको छ। प्रदर्शनअघि नै फिल्मले देशभर ६० भन्दा बढी शो पाएको थियो।
यसैगरी प्रेमकथामा आधारित चलचित्र ‘माया बस्छ कि के हो !’ पनि शुक्रबारबाट प्रदर्शनमा आएको छ। युरोपेली परिवेशमा छायांकन गरिएको यस फिल्मले प्रेम, सम्बन्ध र भावनात्मक उतारचढावलाई कथाको केन्द्रमा राखेको छ।
तीनवटै फिल्मको प्रदर्शनसँगै नेपाली चलचित्रका दर्शकले एउटै साता फरक स्वादका फिल्म रोज्न पाउने भएका छन्। मल्टिप्लेक्स तथा अन्य हलमा प्राप्त शोका आधारमा शुक्रबारदेखि तीन फिल्मले आफ्नो प्रदर्शन यात्रा सुरु गरेका हुन्।
दशैं नजिकिँदै गर्दा नेपाली फिल्मको प्रदर्शन बढ्ने क्रमसँगै हलमा दर्शकको चाप पनि बढ्ने अपेक्षा गरिएको छ। अब यी तीन फिल्मको व्यापार तथा दर्शक प्रतिक्रिया कस्तो रहन्छ भन्ने चासो चलचित्र क्षेत्रको रहेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.