चलचित्रमा मदनकृष्ण श्रेष्ठको भूमिका अभिनेता महेश त्रिपाठीले निर्वाह गर्नेछन्। यस्तै, केकी अधिकारी मदनकृष्णकी श्रीमती यशोदाको भूमिकामा देखिनेछिन्।

हरिवंश आचार्यको भूमिकामा अरुण क्षेत्री प्रस्तुत हुँदैछन् भने उनको जोडीका रूपमा वर्षा राउतले हरिवंश आचार्यकी श्रीमतीको भूमिका निर्वाह गर्नेछिन्। मदनकृष्ण श्रेष्ठ र हरिवंश आचार्यको चर्चित कलाकारिता जोडीलाई ‘मह जोडी’का रूपमा चिनिन्छ।

मदनकृष्ण श्रेष्ठको बाल्यकालदेखि सरकारी जागिरे जीवन, हरिवंश आचार्यसँगको सहकार्य, अन्तरजातीय विवाहलगायत जीवनका महत्वपूर्ण घटना तथा सुख–दुःख र संघर्षलाई चलचित्रमा समेटिनेछ।

चलचित्रमा राजाराम पौडेल, किरण केसी, रमेश बुढाथोकी, विनोद न्यौपाने, रुषा न्यौपाने, यमन श्रेष्ठ, देशभक्त खनाल, दिनेश डिसी, कृष्णभक्त महर्जन, सुरज तमु, दीया जिसी, सिर्जना अधिकारी, हिउँवाला गौतमलगायत कलाकारको पनि अभिनय रहनेछ।

भिन्टेज मोसन पिक्चर्सको प्रस्तुतिमा निर्माण हुने ‘म मदनकृष्ण’का निर्माता राजकुमार श्रेष्ठ हुन्। चलचित्रको निर्देशन मिलन चाम्सले गर्दैछन्। चाम्सले यसअघि राष्ट्रिय महिला फुटबल टोलीकी गोलरक्षक तथा कप्तान एन्जिला तुम्बापो सुब्बाको जीवनमा आधारित बायोपिक ‘अञ्जिला’ निर्देशन गरेका थिए।

चलचित्रको काठमाडौं उपत्यकामा रिच इन्टरटेनमेन्टका करण श्रेष्ठ तथा उपत्यकाबाहिर आरआर फिल्म्सका रोहित कट्टेल र रत्न श्रेष्ठले वितरण गर्नेछन्।