काठमाडौं । अभिनेता निखिल उप्रेतीको होम प्रोडक्सनमा निर्माण भएको नेपाली फिल्म ‘आचार्य’को ट्रेलरले नेपालसँगै भारतमा पनि चर्चा पाउन थालेको छ। असोज ९ गतेदेखि प्रदर्शनमा आउने तयारीमा रहेको फिल्मको ट्रेलरलाई लिएर भारतीय फिल्म पत्रकार, कलाकार तथा दर्शकले सामाजिक सञ्जालमार्फत प्रतिक्रिया जनाइरहेका छन्।
निर्माणपक्षका अनुसार भारतका विभिन्न क्षेत्रका फिल्म पत्रकार तथा दर्शकले ट्रेलरको एक्सन, प्रस्तुति, प्राविधिक पक्ष तथा निखिल उप्रेतीको उपस्थितिबारे चर्चा गरेका छन्। विशेषगरी दक्षिण भारतसहित अन्य भारतीय फिल्म क्षेत्रका दर्शकमाझ समेत ट्रेलरले ध्यान खिचेको निर्माणपक्षको दाबी छ।
सामाजिक सञ्जालमा आएका प्रतिक्रियामा पछिल्लो समय नेपाली फिल्मको प्राविधिक तथा प्रस्तुतिगत स्तरमा आएको परिवर्तनबारे समेत चर्चा गरिएको छ। केही भारतीय दर्शक तथा फिल्मकर्मीले नेपाली फिल्म आफ्नै कथा र शैलीसहित अन्तर्राष्ट्रिय दर्शकमाझ पुग्ने प्रयास गरिरहेको उल्लेख गरेका छन्।
भारतीय कलाकार रघुबाबुलगायतले समेत ‘आचार्य’ र निखिल उप्रेतीबारे भारतीय फिल्म क्षेत्रभित्र चर्चा भइरहेको बताएका छन्। निर्माणपक्षका अनुसार भारतका विभिन्न फिल्म स्टुडियो तथा प्रोडक्सन हाउसमा समेत नेपाली फिल्म र कलाकारप्रति चासो बढ्दै गएको छ।
यसैबीच, ‘आचार्य’को ट्रेलर सार्वजनिक भएपछि नेपालमा पनि फिल्मको एक्सन, निखिल उप्रेतीको प्रस्तुति तथा निर्माणस्तरलाई लिएर चर्चा भइरहेको छ। ट्रेलरमा एक्सन, द्वन्द्व, भावनात्मक सम्बन्ध र सामाजिक परिवेशलाई समेटिएको देखाइएको छ।
निखिल उप्रेतीको होम प्रोडक्सनमा निर्माण भएको फिल्मलाई निखिल स्वयंले निर्देशन तथा अभिनय गरेका हुन्। ट्रेलर सार्वजनिक कार्यक्रममा उनले नेपाली फिल्मले आफ्नै पहिचानसहित अगाडि बढ्नुपर्ने धारणा राखेका थिए।
निर्माणपक्षले भारतमा ट्रेलरले पाएको प्रतिक्रियालाई नेपाली फिल्मप्रति छिमेकी मुलुकका दर्शक तथा फिल्मकर्मीको बढ्दो चासोका रूपमा लिएको छ।
‘आचार्य’ असोज ९ गतेदेखि नेपालसहित विभिन्न स्थानमा प्रदर्शनमा आउने तयारीमा रहेको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.