‘बेहुली’ तेस्रो हप्तामा, व्यापार ३ करोड नजिक

नमस्ते चितवन

शुक्रबार, असोज ०९, २०८३ मा प्रकाशित

काठमाडौं । पारिवारिक कथामा आधारित चलचित्र ‘बेहुली’ प्रदर्शनको तेस्रो हप्तामा प्रवेश गरेको छ। पहिलो र दोस्रो हप्तामा दर्शकको उत्साहजनक साथ पाएको चलचित्रले हालसम्म करिब ३ करोड रुपैयाँको व्यापार गरेको निर्माण पक्षले जनाएको छ।

प्रस्तुतकर्ता अर्जुन पोखरेलका अनुसार प्रदर्शनको सुरुवाती दिनदेखि नै चलचित्रले देशभरका हलमा राम्रो दर्शक पाइरहेको छ। पहिलो हप्तामा उत्साहजनक व्यापार गरेको ‘बेहुली’ले दोस्रो हप्तामा पनि आफ्नो पकड कायम राखेको निर्माण पक्षको दाबी छ।

चलचित्रको व्यापारसँगै मुख्य कलाकार पारस बम ठकुरी र दिव्या रायमाझीको हल भ्रमणले पनि दर्शकमाझ थप उत्साह बढाएको छ। दुवै कलाकार विभिन्न हलमा पुगेर दर्शकसँग प्रत्यक्ष भेटघाट गरिरहेका छन्। हल भ्रमणका क्रममा कलाकारले दर्शकबाट पाइरहेको प्रतिक्रियाले चलचित्रप्रतिको रुचि कायमै रहेको निर्माण पक्षको भनाइ छ।

‘बेहुली’मा पारिवारिक सम्बन्ध, युवा पुस्ताको मनोभाव र नेपाली समाजका भावनात्मक पक्षलाई कथाको आधार बनाइएको छ। चलचित्रमा पारस बम ठकुरी ‘कुलब्वाय’, दिव्या रायमाझी, सुशान्त कार्की, पदम तामाङ, सन्तोष बानियाँलगायत कलाकारको अभिनय छ।

माधव शर्माको लेखन तथा सशान कँडेलको निर्देशन रहेको चलचित्रका प्रस्तुतकर्ता अर्जुन पोखरेल हुन्। प्रताप शमशेर राणा निर्माता रहेको चलचित्रमा शङ्कर कोइराला र रमेश सिलवाल कार्यकारी निर्माता तथा दुर्गा खरेल र शिशिर श्रेष्ठ सह–निर्माता छन्।

नेपालमा प्रदर्शन भइरहेको ‘बेहुली’ अमेरिका, अस्ट्रेलिया तथा मध्यपूर्वका विभिन्न देशमा समेत प्रदर्शनमा रहेको निर्माण पक्षले जनाएको छ।