काठमाडौं । लगातारको वर्षाका कारण प्रभावित चलचित्र ‘बाः एक योद्धा’को प्रदर्शनमा मौसम खुलेसँगै सुधार देखिन थालेको छ। शुक्रबारदेखि प्रदर्शनमा आएको चलचित्रले राम्रो प्रतिक्रिया पाए पनि वर्षाका कारण सुरुआती दुई दिन अपेक्षाअनुसार दर्शकको साथ पाउन सकेको थिएन।
आइतबार दिउँसोदेखि मौसम सफा हुँदै गएपछि चलचित्रका शोमा दर्शकको चाप बढेको निर्माण पक्षले जनाएको छ। आइतबार मध्याह्नपछि अधिकांश शोमा ८० प्रतिशतभन्दा बढी अकुपेन्सी रहेको र केही शो हाउसफुलसमेत भएको निर्देशक तथा निर्माता हरि लम्सालले बताए।
“आजबाट सिनेमाले गति समातेको छ। मौसममा सुधार देखिन सुरु गरेपछि हाम्रो चलचित्रका शो पनि हाउसफुल हुन थालेका छन्,” लम्सालले भने, “दुई दिन वर्षाको असर पर्यो। तर आजबाट दर्शकमा देखिएको उत्साहले हामी पनि उत्साही भएका छौँ।”
लम्सालका अनुसार चलचित्र हेरेका अधिकांश दर्शकले कथा भावनात्मक रहेको र आफू, आफन्त तथा छिमेकीले देखे–भोगेकै जीवनसँग जोडिएको प्रतिक्रिया दिएका छन्। कतिपय दर्शकले चलचित्रले भावुक बनाएको र रुवाएको समेत बताएका छन्।
चलचित्रप्रति दर्शकले अभिभावकले आफ्ना सन्तानलाई देखाउनुपर्ने धारणा राखेको निर्माण पक्षले जनाएको छ। आफ्नो अधिकार खोज्ने तर दायित्व बिर्सने सन्तानका लागि चलचित्रले महत्वपूर्ण सन्देश दिने दर्शकको प्रतिक्रिया आएको लम्सालले बताए।
‘बाः एक योद्धा’मा सन्तानको भविष्यका लागि बुवाआमाले गर्ने त्याग, संघर्ष र जीवनभर भोग्ने चुनौतीलाई मुख्य कथाका रूपमा प्रस्तुत गरिएको छ। सन्तानको इच्छा पूरा गर्न अभिभावकले गर्ने संघर्षसँगै वृद्ध अवस्थामा उनीहरूले भोग्नुपर्ने दुःख र पारिवारिक सम्बन्धलाई समेत चलचित्रले समेटेको छ।
हरि लम्सालको लेखन तथा निर्देशन रहेको चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापालगायत कलाकारको अभिनय छ।
आर्टिस्टिक इन्टरटेनमेन्टको ब्यानरमा निर्माण भएको चलचित्रका निर्माता वसन्त लम्साल हुन्। अनिल बुढाथोकी कार्यकारी निर्माता, अर्जुन पौडेल लाइन प्रोड्युसर र कृष्ण काफ्ले सह–निर्माता रहेका छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.