काठमाडौं । प्रदर्शनको पहिलो दिनबाट क्रमशः दर्शक बढाउँदै गएको चलचित्र ‘बाः एक योद्धा’ दोस्रो हप्तामा प्रवेश गरेको छ। गत शुक्रबारदेखि प्रदर्शनमा आएको चलचित्रले सात दिनमा १ करोड ११ लाख रुपैयाँ ग्रस कलेक्सन गरेको निर्माण पक्षले जनाएको छ।
पहिलो दिन ६ लाख रुपैयाँ ग्रस कलेक्सन गरेको चलचित्रले बिहीबारसम्म आइपुग्दा आफ्नो व्यापार निरन्तर उकालो लगेको हो। सात दिनमा ४० हजार ८२३ दर्शकले चलचित्र हेरेका छन्।
चलचित्रमा ‘बा’को भूमिका निर्वाह गरेका दिव्यदेवले यसको व्यापारलाई इभी गाडीसँग तुलना गरेका छन्। पेट्रोल तथा डिजेल गाडीले जस्तै सुरुवातमा विस्तारै गति लिए पनि अहिले चलचित्रले रफ्तार बढाउँदै गएको उनको भनाइ छ।
दर्शकको प्रतिक्रिया र ‘वर्ड अफ माउथ’ बलियो बन्दै गएपछि हलमा दर्शकको चाप बढेको निर्देशक हरि लम्सालले बताए। उनका अनुसार दर्शकले चलचित्र मन पराएर परिवारका अन्य सदस्यलाई समेत हेर्न पठाउने प्रतिक्रिया दिइरहेका छन्।
“हरेक दिन सिनेमाको व्यापार बढिरहेको छ। चलचित्र हेर्ने दर्शकले परिवारका सबै सदस्यलाई सिनेमा हेर्न पठाउने बताइरहनुभएको छ,” निर्देशक लम्सालले भने।
उनले दोस्रो साताबाट अझ धेरै दर्शकको साथ पाउने अपेक्षा पनि व्यक्त गरे। चलचित्रको माग बढेसँगै हलहरूले शो संख्या समेत विस्तार गर्न थालेका छन्। वितरकका अनुसार देशभर ‘बाः एक योद्धा’ले एक सयभन्दा बढी शो पाएको छ।
पारिवारिक कथावस्तुमा आधारित चलचित्रले सन्तानको भविष्यका लागि आमाबाबुले गर्ने त्याग, संघर्ष र जीवनभर भोग्ने चुनौतीलाई प्रस्तुत गरेको छ। विशेषगरी सन्तानको इच्छा पूरा गर्न अभिभावकले गर्ने संघर्षदेखि वृद्ध अवस्थामा उनीहरूले पाउने उपेक्षा र दुःखसम्मका विषय चलचित्रमा समेटिएका छन्।
हरि लम्सालको लेखन तथा निर्देशनमा बनेको चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापालगायतको अभिनय छ।
आर्टिस्टिक इन्टरटेनमेन्टको ब्यानरमा निर्माण भएको चलचित्रका निर्माता वसन्त लम्साल हुन्। अनिल बुढाथोकी कार्यकारी निर्माता, अर्जुन पौडेल लाइन प्रोड्युसर र कृष्ण काफ्ले सह–निर्माता रहेका छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.