‘मेहनत गरेर बनाएको फिल्म चल्दो रहेछ’ : माओत्से

कार्यक्रममा निर्देशक, अभिनेता तथा निर्माता माओत्से गुरुङले चलचित्रको सफलताले आफूहरूको मेहनतलाई प्रमाणित गरेको बताए।

दुःख र मेहनत गरेर बनाएको चलचित्रलाई दर्शकले माया र साथ दिँदा आफूहरू उत्साहित भएको उनको भनाइ थियो। चौथो हप्तासम्म पनि दर्शकको साथ पाउनु निर्माण टिमका लागि ठूलो उपलब्धि भएको उनले बताए।

‘स्टारडमभन्दा कथा बलियो हुन्छ’ : दयाहाङ

कार्यक्रममा अभिनेता दयाहाङ राईले चलचित्र सफल बनाउन कलाकारको स्टारडमभन्दा कथा महत्वपूर्ण हुने बताए।

उनका अनुसार कलाकारलाई स्टार बनाउने आधारसमेत कथा नै हो। “कथाले नै कलाकारलाई स्टार बनाउने भएकाले अन्ततः कथा नै बलियो हुन्छ। कथा बलियो भएपछि फिल्म चल्छ। स्टारडमले फिल्मलाई केही हदसम्म सपोर्ट गर्ने मात्र हो,” उनले भने।

भदौ २६ गतेदेखि प्रदर्शनमा आएको ‘पेन्सन पट्टा’ले पहिलो सातादेखि नै दर्शकको साथ पाउँदै आएको छ। दोस्रो र तेस्रो सातामा समेत चलचित्रले राम्रो शो संख्या कायम राखेको थियो। चौथो हप्ताको पहिलो दिन ९२ शो पाएसँगै चलचित्रको प्रदर्शन यात्रा अझै निरन्तर रहेको निर्माण पक्षले जनाएको छ।