‘पाँच पाण्डव’को दोस्रो पोस्टर सार्वजनिक, द्रौपदीको भूमिकामा इभा गिरी

काठमाडौं । मल्टिस्टारर चलचित्र ‘पाँच पाण्डव’को दोस्रो पोस्टर सार्वजनिक गरिएको छ । पहिलो पोस्टरमार्फत पाँच पाण्डवलाई सार्वजनिक गरेको निर्माणपक्षले दोस्रो पोस्टरमा द्रौपदीको लुक्स सार्वजनिक गरेको हो ।

चलचित्रमा द्रौपदीको भूमिकामा अभिनेत्री इभा गिरी देखिएकी छन् । रातो साडी, सोल्जर कट ब्लाउज र हल्का गहनामा प्रस्तुत इभाको लुक्सले महाभारतकी द्रौपदीको झल्को दिन्छ । पोस्टरमा उनको आकर्षक लुक्सलाई प्रमुखताका साथ प्रस्तुत गरिएको छ ।

पोस्टरको पृष्ठभूमिमा चलचित्रका पाँच पाण्डवलाई देखाइएको छ । पहिलो पोस्टरमा रथमा प्रस्तुत गरिएका पाँच पाण्डवलाई दोस्रो पोस्टरमा पृष्ठभूमिमा राख्दै निर्माणपक्षले चलचित्रका मुख्य पात्रहरूलाई पुनः स्मरण गराएको छ ।

पहिलो पोस्टरमा हरिवंश आचार्यलाई युधिष्ठिर, जितु नेपाललाई भीम, आर्यन सिग्देललाई अर्जुन, महेश त्रिपाठीलाई नकुल र सुशील सिटौलालाई सहदेवको भूमिकामा प्रस्तुत गरिएको थियो ।

निर्देशक वसन्त निरौलाले इभा गिरीको द्रौपदी अवतार दर्शकले रुचाउने विश्वास व्यक्त गरेका छन् । उनका अनुसार इभालाई चलचित्रमा द्रौपदीको चरित्रमा प्रस्तुत गरिएको छ । युवा पुस्तामाझ लोकप्रिय रहेकी इभाको यो भूमिकाले पनि दर्शकको ध्यान खिच्ने निर्देशक निरौलाको विश्वास छ ।

तिहारको छेको पारेर कार्तिक २० गते अर्थात् नोभेम्बर ६ देखि प्रदर्शनमा आउने तयारीमा रहेको ‘पाँच पाण्डव’ अहिले पोस्ट प्रोडक्सनको अन्तिम चरणमा छ । चलचित्रको सम्पूर्ण साउन्ड डल्बी एटमसमा तयार गरिएको निर्माणपक्षले जनाएको छ । निर्देशक निरौलाका अनुसार दर्शकले चलचित्र हेर्दा पूर्ण डल्बी एटमस साउन्डको अनुभव लिन पाउनेछन् ।

काली रानी फिल्मस्को ब्यानरमा निर्माण भइरहेको चलचित्रमा नेपाली सिने जगतका दिग्गज कलाकारदेखि नयाँ पुस्ताका चर्चित कलाकारसम्मको अभिनय छ । हरिवंश आचार्य, जितु नेपाल, आर्यन सिग्देल, महेश त्रिपाठी र सुशील सिटौला मुख्य पाँच पाण्डवको भूमिकामा छन् ।

त्यस्तै, दीपाश्री निरौला, सरिता गिरी, विनोद न्यौपाने, रमा थपलिया, प्रशान्त ताम्राकार, इभा गिरी, सीता न्यौपाने र रितेश पौडेल (रितेशजंग खत्री) लगायतका कलाकारको पनि चलचित्रमा महत्वपूर्ण भूमिका छ ।

चलचित्रका प्रस्तुतकर्ता नवीन श्रेष्ठ हुन् । उनले यसअघि ‘लाज शरणम्’ निर्माण गरेका थिए । चलचित्रकी निर्मात्री काली रानी श्रेष्ठ हुन् ।

‘पाँच पाण्डव’को कथा, पटकथा तथा संवाद सुशील पौडेलले लेखेका हुन् । पौडेलले चलचित्रलाई ‘सोसल ड्रामा’का रूपमा प्रस्तुत गरिएको बताएका छन् । उनका अनुसार महाभारतका पाँच पाण्डवका चरित्र र विम्बलाई आधार बनाएर चलचित्रले समकालीन नेपाली समाजको कथा प्रस्तुत गर्नेछ ।

श्याम तामाङको छायांकन रहेको चलचित्रमा सुप्रिम पराजुलीको सम्पादन तथा सम्राट बस्नेतको फाइट निर्देशन छ । गम्भीर विष्ट र विक्रम स्वाँरको कोरियोग्राफी रहेको चलचित्रमा रङ्ग सम्पादन, अर्जुन पोखरेलको संगीत, उत्तम न्यौपानेको साउन्ड डिजाइन, सुजिल कर्माचार्यको ब्याकग्राउन्ड म्युजिक (बीजीएम) र पुकार धिमालको भीएफएक्स रहेको छ ।

रोहित राज गौतम एचओपी तथा विष्णु बुढाथोकी प्रोडक्सन म्यानेजर छन् ।चलचित्रलाई रोहित कट्टेल र रत्न श्रेष्ठको आरआर फिल्मसले देशव्यापी वितरण गर्नेछ ।

मङ्गलबार, असोज २०, २०८३ मा प्रकाशित