सौगात मल्ल स्टारर ‘जुबा’को ९० दिनमा छायांकन सम्पन्न

नमस्ते चितवन

बुधबार, असोज २१, २०८३ मा प्रकाशित

काठमाडौं । अभिनेता सौगात मल्लको मुख्य भूमिका रहेको चलचित्र **‘जुबा’**को छायांकन सम्पन्न भएको छ । अस्त्र फिल्मसको प्रस्तुतिमा निर्माण भएको चलचित्रको छायांकन ९० दिनमा पूरा भएको निर्माण टिमले जनाएको छ ।

चलचित्रको छायांकन नेपालका सर्लाही, दाप्चा, काठमाडौं र भक्तपुरसँगै भारतको राजस्थानमा गरिएको हो । निर्माण टिमका अनुसार निर्धारित समयभन्दा केही बढी समय लिएर कथावस्तु र दृश्यको आवश्यकताअनुसार चलचित्रको छायांकन गरिएको हो ।

कलाकार तथा प्राविधिकको निरन्तर मेहनत र सहकार्यमा छायांकन सम्पन्न भएको जनाउँदै निर्माण टिमले अब पोस्ट–प्रोडक्सनको कामलाई पनि पर्याप्त समय दिएर अघि बढाउने जनाएको छ । दर्शकलाई उत्कृष्ट चलचित्र प्रस्तुत गर्ने उद्देश्यले निर्माणको हरेक चरणमा गुणस्तरलाई प्राथमिकतामा राखिएको टिमको भनाइ छ ।

अस्त्र फिल्मसको ब्यानरमा निर्माण भएको चलचित्रकी निर्मात्री सजना थापा हुन् भने सहनिर्माता शेखर पाण्डे रहेका छन् । चलचित्रको कथा तथा निर्देशन प्रकाश कर्णको रहेको छ भने पटकथा लेखन वर्षा पौडेलले गरेकी छन् ।

चलचित्रमा सौगात मल्लसँगै सोफी धरेल र सुधन पोखरेल मुख्य भूमिकामा छन् । सोफीले ‘जुबा’बाट अभिनयमा डेब्यु गर्दैछिन् । सुधनको यो तेस्रो चलचित्र भए पनि मुख्य भूमिकामा भने पहिलोपटक देखिन लागेका हुन् । उनले यसअघि अभिनय गरेका दुई चलचित्र प्रदर्शनमा आउन बाँकी छन् ।

चलचित्र निर्माणको घोषणा गरिएसँगै ‘जुबा’का तीनवटा क्यारेक्टर पोस्टरसमेत सार्वजनिक गरिएको थियो । पोस्टरमा सौगातको एकल लुक्स, पीसीओबाट फोनमा कुराकानी गरिरहेको दृश्य तथा सिगारसहितको सुधनको लुक्स प्रस्तुत गरिएको थियो । सुधनको गेटअपले उनी चलचित्रमा खलपात्रको भूमिकामा हुन सक्ने संकेत गरेको छ ।

कलाकारको पहिरन, गेटअप र दृश्य परिवेशले चलचित्रको कथा करिब दुई दशकअघिको समयसँग सम्बन्धित हुन सक्ने अनुमान गर्न सकिन्छ । यद्यपि, निर्माण टिमले चलचित्रको विस्तृत कथावस्तु भने सार्वजनिक गरेको छैन ।

‘जुबा’को प्रदर्शन मिति हालसम्म तय गरिएको छैन । पोस्ट–प्रोडक्सनको काम अघि बढेसँगै उपयुक्त प्रदर्शन मिति तय गरेर छिट्टै सार्वजनिक गरिने निर्माण टिमले जनाएको छ ।

बुधबार, असोज २१, २०८३ मा प्रकाशित