कांग्रेसको १५औँ महाधिवेशनमा आज मतदान, दिउँसो ३ बजेसम्म समय

नमस्ते चितवन

शुक्रबार, असोज २३, २०८३ मा प्रकाशित

काठमाडौं । नेपाली कांग्रेसको १५औँ महाधिवेशनअन्तर्गत आज मतदान हुँदै छ। बिहीबारका लागि तय गरिएको मतदान आज हुन लागेको हो।

महाधिवेशन प्रतिनिधिहरूलाई बिहान ६ बजे नै निर्वाचन क्षेत्रमा उपस्थित हुन भनिएको छ। मतदान बिहान ७ बजेदेखि सुरु भई दिउँसो ३ बजेसम्म चल्नेछ। मतदान सकिएलगत्तै मतगणना सुरु गर्ने तयारी गरिएको छ।

मतदानपछि मतपेटिकाहरू कांग्रेस केन्द्रीय कार्यालय सानेपा लगिनेछन्। त्यहाँ १२ देखि १३ स्थानमा एकैपटक मतगणना गर्ने निर्वाचन समितिको तयारी छ। मतगणनाका लागि पाँच सय कानुन व्यवसायीलाई तयारी अवस्थामा राखिएको जनाइएको छ।

निर्वाचन समितिले बिहीबार साँझ मात्रै मतपत्र छपाइको काम सम्पन्न गरेको जनाएको छ। समितिका सदस्यसचिव राजु कटुवालका अनुसार महाधिवेशनमा ८५० जनाले मनोनयनपत्र दर्ता गराएका थिए। उम्मेदवारीको वैधता परीक्षणमा धेरै समय लागेकाले मतपत्र छपाइमा ढिलाइ भएको हो।