काठमाडौं । दसैँको अवसर पारेर प्रदर्शनमा आउन लागेको बहुप्रतीक्षित नेपाली चलचित्र ‘आ बाट आमा २’ले सेन्सर बोर्डबाट ‘पीजी’ (प्यारेन्टल गाइडन्स) प्रमाणपत्र प्राप्त गरेको छ। असोज ३० गते शुक्रबारदेखि देशव्यापी प्रदर्शनमा आउने तयारीमा रहेको चलचित्र हेर्न १६ वर्षभन्दा कम उमेरका दर्शकले अभिभावकको साथमा जानुपर्नेछ।
चन्द्र पन्तको कथा तथा निर्देशनमा निर्माण भएको चलचित्रमा विपना थापा, पल शाह, मलिका महत, रिश्ता गुरुङ, निकिता आचार्य, आकाश श्रेष्ठ, सबिन श्रेष्ठ, प्रदीप रावत, साइग्रेस पोखरेल, गजित विष्ट, नरेन खड्का र दिलिप अखेडालगायत कलाकारको अभिनय रहेको छ।
पारिवारिक प्रेम, सम्बन्धको मिठास तथा आमा र सन्तानबीचको भावनात्मक सम्बन्धलाई मुख्य विषय बनाइएको चलचित्रले प्रदर्शनअघि नै दर्शकमाझ राम्रो चर्चा बटुलेको छ। चलचित्रका गीत, टिजर र ट्रेलरले दर्शकको ध्यान खिचिरहेका छन्।
निर्माण पक्षका अनुसार चलचित्रको ट्रेलर सार्वजनिक भएको एक दिनमै ३७ लाखभन्दा बढी पटक हेरिएको थियो। दसैँ गीत ‘क्या दामी देखिया’ले सार्वजनिक भएको छ दिनमै ४३ लाखभन्दा बढी भ्युज प्राप्त गरेको छ। यसअघि सार्वजनिक गीत ‘अचेल किन कान्छी’लाई पनि ६४ लाखभन्दा बढी पटक हेरिसकिएको छ। चलचित्रको टिजरले समेत दर्शकबाट राम्रो प्रतिक्रिया पाएको निर्माण पक्षको भनाइ छ।
चलचित्रको लेखनमा रोशन भट्ट र चन्द्र पन्तले सहकार्य गरेका छन् भने संवाद रोशन भट्टले लेखेका हुन्। नवराज उप्रेतीको छायांकन, बाबुल गिरीको संगीत र गम्भीर बिष्टको नृत्य निर्देशन रहेको चलचित्रका प्रोडक्सन एक्जिक्युटिभ करण सिंह हुन्।
साहिल खान र मिलन श्रेष्ठले सम्पादन गरेको चलचित्रको डिजिटल पार्टनर ओएसआर डिजिटल रहेको छ। चलचित्रलाई नेपालभर आरआर फिल्म्सले वितरण गर्नेछ।
‘आ बाट आमा २’ दसैँको बिदालाई लक्षित गर्दै असोज ३० गतेदेखि देशभरका सिनेमाघरमा प्रदर्शनमा आउनेछ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.