नेपाली कांग्रेसको महासमिति बैठकमा गठबन्धन नगर्ने गगनको प्रस्ताव

नमस्ते चितवन

मङ्गलबार, फागुन ०८, २०८० मा प्रकाशित

नेपाली कांग्रेसको महासमिति बैठक सोमबारदेखि ललितपुरको गोदावरीमा सुरु भएको छ।
महासमिति बैठक सुरु हुनुअघि कांग्रेसमा सांगठनिक प्रस्तावबारे निक्कै रस्साकस्सी चल्यो। सोमबार अपराह्नदेखि निवास बुढानिलकण्ठमा करिब ५ घन्टा पदाधिकारी र पूर्वपदाधिकारी सहभागी बैठकमा महामन्त्री थापाको प्रस्तावबारे केन्द्रित रहेर छलफल भएको थियो।

महामन्त्री थापाले महासमितिमा पेस गर्ने प्रस्तावमा ‘०७९ को चुनावमा गठबन्धन गर्नु हाम्रो बाध्यता थियो, तर नेपाली कांग्रेस दृढ संकल्प गर्छ कि हामी आगामी चुनावहरू हाम्रो आफ्नै तागतमा एक्लै लड्ने छौं, र हाम्रा समर्थक(शुभेच्छुकलाई रूख चिह्नमा मात्रै मत हाल्न पाउने सुनिश्चित गर्नेछौं’ भन्ने लेखिएपछि सभापति देउवा असन्तुष्ट थिए।

महामन्त्री गगन थापाले तयार पारेको सांगठनिक प्रतिवेदनमा समेटिएको चुनावअघि गठबन्धन नगर्ने शब्द हटाउने प्रयास गरिरहेका देउवाले बैठकको उद्घाटनसत्रमै यसबारे धारणा राखेर आफ्नो असहमति देखाइसकेका छन्।

गोदावरी पुगेर महासमिति बैठकको उद्घाटनसत्रलाई सम्बोधन गर्दै देउवाले भविष्यमा गठबन्धन गर्ने वा नगर्ने भन्ने कुरा तत्कालीन परिस्थितिले निर्धारण गर्ने भएकाले अहिले नै निर्णय लिनु उचित नहुने जवाफ महामन्त्री थापालाई दिएका छन्। गठबन्धनको निरन्तरता राजनीतिक जिम्मेवारी भएको बताएका देउवाले तत्कालीन परिस्थितिले गठबन्धन गर्ने वा नगर्ने भन्ने कुरा निर्धारण गर्ने बताए। तर, अहिले नै यसबारे निर्णय लिनु उचित नहुने उनको दाबी छ। २०८४ को चुनावी गठबन्धन अहिलै निषेध गर्दा केही महिनापछि आउन लागेको सत्तारोहणको अवसर धरापमा पर्न सक्नेमा देउवा चिन्तित छन् ।

८० प्रतिशत केन्द्रीय सदस्य र बहुसंख्यक प्रतिनिधि आफ्नो पक्षका रहेको हलबाट प्रधानमन्त्री पुष्पकमल दाहाल प्रचण्डलाई चिढ्याउने प्रस्ताव पारित गर्न दिने पक्षमा देउवा देखिँदैनन् । त्यसैले उनले बालुवाटार पुगेर यसबारे आश्वास्त तुल्याउने प्रयास गरिसकेका छन्।

गठबन्धनका नेताहरूले यसअघि पनि संकट परेका बेला भेट्ने गरेका थिए। यस पटक महासमिति बैठकमा दस्तावेजलाई लिएर कांग्रेसमा गम्भीर किचलो देखिँदा त्यसका बाछिटा गठबन्धनमा पनि पर्ने चिन्ता छ।