प्रतिनिधि सभामा बिमस्टेक बडापत्रको प्रावधानमाथि छलफल

नमस्ते चितवन

मङ्गलबार, चैत २०, २०८० मा प्रकाशित

बहुपक्षीय प्राविधिक तथा आर्थिक सहयोगका लागि बङ्गालको खाडीको देशको प्रयास (बिमस्टेक) बडा पत्रको प्रावधानमाथि छलफल सुरु भएको छ ।

मङ्गलबार प्रतिनिधि सभा बैठकमा बिमस्टेकको बडा पत्र सांसदबाट अनुमोदन गर्नुपर्ने भएकाले सो सम्बन्धमा छलफल सुरु गरिएको हो । बैठकमा बोल्नुहुँदै एमालेका सांसद रघुजी पन्तले बिमस्टेकबाट नेपालले प्राविधिक, शैक्षिक र अनुसन्धानको क्षेत्रमा फाइदा लिन सक्ने बताउनुभयो । उहाँले क्षेत्रीय सङ्गठनमा भारतको बढी चासो भएको उल्लेख गर्नुहुँदै देशको हितमा यसलाई परिचालन गर्न नेपाल सरकारले विशेष जोड दिनुपर्ने बताउनुभयो ।

राष्ट्रिय स्वतन्त्र पार्टीका उपसभापति डा. स्वर्णिम वाग्लेले बिमस्टेकमा नेपालको सार्वभौमिकतामाथि आँच आउने कुनै पनि प्रावधान नभएकाले त्यसको स्वागत गर्नुपर्ने बताउनुभयो । उहाँले बिमस्टेकलाई सशक्त बनाउन सकियो भने त्यसले नेपालको हित नै गर्ने विश्वास समेत व्यक्त गर्नुभयो ।

सांसद वाग्लेले आर्थिक उन्नयन, सामाजिक प्रगति, वैज्ञानिक उपलब्धि, शान्ति, स्थायित्व, कनेक्टिभिटी जस्ता मुद्दाहरूमा बिमस्टेकले जोड दिएको उल्लेख गर्दै नेपालले पनि त्यसमा सहकार्यको हातलाई बलियो बनाउँदै लैजानुपर्ने आवश्यकता औँल्याउनुभयो ।