प्रस्तावित १७ राजदूतको सुनुवाइ भदौ १४ देखि हुने

नमस्ते चितवन

मङ्गलबार, भदौ ११, २०८१ मा प्रकाशित

विभिन्न देशका लागि प्रस्तावित राजदूतहरूको संसदीय सुनुवाइ प्रक्रिया भदौ १४ गतेदेखि शुरु हुने भएको छ।

मंगलवार सिंहदरबारमा बसेको संसदीय सुनुवाइ समितिको बैठकले प्रस्तावित १७ देशका राजदूतहरूमाथि परेको उजुरीसहितको सुनुवाइ भदौ १४ गतेदेखि शुरु गरी भदौ १६, १७ , १८, १९, २०, २४ र २५ गते गरी ८ दिनमा सम्पन्न गर्ने कार्ययोजना पारित गरेको हो।

भदौ २१ गते तिज, २२ गते शनिवार र २३ गते पञ्चमीको बिदा परेकाले त्यसअघि र पछि गरी ८ दिनमा संसदीय सुनुवाइ प्रक्रिया सम्पन्न गर्ने कार्ययोजना तय गरिएको समितिकी सभापति ईश्वरीदेवी न्यौपानेले जानकारी दिइन्। उजुरी थोरै भएकाले सुनुवाइ प्रक्रिया छोटिन पनि सक्ने समितिको निष्कर्ष छ।

सभापति न्यौपानेले भनिन्, ‘१४ गते हामीले ४ जना राखेका छौं। यसलाई धेरै नलम्ब्याऔं। उहाँहरूको सुनुवाइ सकिनेबित्तिकै निर्णय गर्नुअघि परराष्ट्रमन्त्रीसँग पनि छलफल गर्नेछौं। उजुरी धेरै नपरेकाले त्यसमा अझ बढी छिटो हुन पनि सक्छ।’