अनमोल केसीको चलचित्र ‘जेरी अन टप’ले तिन दिनमा कमायो २ करोड २२ लाख

नमस्ते चितवन

सोमबार, कार्तिक ०३, २०८२ मा प्रकाशित

काठमाडौं , कार्तिक ०३
अनमोल केसी अभिनित चलचित्र ‘जेरी अन टप’ले तिन दिनको बक्सअफिस कलेक्सन सार्वजनिक भएको छ। चलचित्रले आक्रामक ओपनिङ देखिएको छ । तिन दिनमा चलचित्रले दुई करोड माथि ग्रस कलेक्सन गरेको छ ।

‘जेरी अन टप’ले पहिलो दिन शुक्रबार ७२ लाख ५९ हजार ,दोस्रो दिन शनिबार ८६ लाख ३८ हजार र तेस्रो दिन आइताबार ६३ लाख ८४ हजार कलेक्सन गरेको निर्माता सरोज न्यौपानेले बताएका छन् । तिन दिनमा चलचित्रले २ करोड २२ लाख ८१ हजार व्यापार गरेको छ ।अष्ट्रेलियामा दुई दिनमा ४६ लाख कलेक्सन गरेको उनले बताए ।

राम्रो वर्डअफ माउथका कारण चलचित्रले दोस्रो दिन पहिलो दिनको भन्दा धेरै कलेक्सन गरेको हो । दोस्रो दिन शनिबार परेका कारण पनि धेरै कलेक्सन भएको हो । त्यस्तै आइताबार बिदा नहुदा पनि चलचित्रले राम्रो व्यापार गरेको हो । आजबाट तिहार बिदा सुरु भएको हुदा वर्ड अफ माउथ राम्रो हुँदै गएकाले ‘जेरी अन टप’ले थप राम्रो कलेक्सन गर्नेमा निर्माण टिम आशावादी छ ।

हलमा अनमोल केसीको स्टारडम देखिएको छ । अनमोलका फ्यान तथा शुभचिन्तक ठूलो संख्यामा हलमा देखिएका छन् । राम्रो प्रतिक्रिया पाइरहेको सिनेमा शुक्रबार पहिलो दिन देखि नै राम्रो अकुपेन्सीमा चलिरहेको छ ।

पहिलो दिन देशभर २०५ भन्दा बढी शोज पाएको यो सिनेमाको शो थपिँदै गएको निर्माता न्यौपानेले बताएका छन् । ‘शोजहरू थपिँदैछन् । अधिकांश शोज हाउसफूल हुँदैछन्,’ उनले भने ।

सुयोग गुरुङको निर्देशनमा निर्माण भएको ‘जेरी अन टप’मा अनमोलसँगै आँचल शर्मा, जसीता गुरुङ, केदार घिमिरे (माग्नेबुढा), भुवन केसी, उषा खड्गीको अभिनय छ ।अभिनेत्री सुरक्षा पन्त विशेष भूमिकामा देखिएकी छिन् ।

अनन्या फिल्मस्को ब्यानरमा सरोज न्यौपानेको प्रस्तुतिमा रोविन शेरचन, रामकृष्ण श्रेष्ठ र दीपक भण्डारीको लगानी रहेको सिनेमाको कथा हेमराज बिसीको हो ।

अनुराधा गिरी र इश्वर श्रेष्ठ कार्यकारी निर्माता तथा एसोसिएट निर्मातामा नविन घिमिरे, विवेक थापा र भविष्य खड्का छन् । सिनेमामा कालिप्रसाद बास्कोटा, जयन जे वाइबा, जोहन चाम्लिङ राई र व्रिजेश श्रेष्ठको संगीत छ ।सगरमाथा आरोहण र यात्राको क्रममा हुने प्रेमकथामा आधारित चलचित्रको पटकथा तथा संवाद लेखन विस्वास तिम्सिना र छायांकन दुलिप रेग्मीको छ ।

सोमबार, कार्तिक ०३, २०८२ मा प्रकाशित