‘अभिमन्यु : च्याप्टर १’को अग्रिम टिकट बुकिङ खुला

नमस्ते चितवन

बुधबार, मङि्सर १७, २०८२ मा प्रकाशित

काठमाडौं, मंसिर १७
यही शुक्रबारबाट प्रदर्शनमा आउने बहुप्रतिक्षित नेपाली चलचित्र ‘अभिमन्यु : च्याप्टर १’ को अग्रिम टिकट बुकिङ खुला भएको छ। अधिकांश मल्टिप्लेक्सहरुले मंगलबारदेखि नै प्री–बुकिङ सुरू गरेका छन्।

चलचित्रले देशभरका प्रमुख मल्टिप्लेक्सहरूमा सन्तोषजनक शो पाएको निर्माण पक्षले जनाएको छ।नेपालकै ठूलो मल्टिप्लेक्स चेन क्यूएफएक्सले काठमाडौंका आउटलेटहरूमा ११ शो दिएको छ।

दोस्रो ठूलो चेन आईएनआईले पाँचवटै आउटलेटमा ११ शो राखेको छ।वान सिनेमाजले दुई आउटलेटमा ६ शो, बिग मुभिज र एफक्युब सिनेमाजले २–२ शो उपलब्ध गराएका छन्। अन्य हलहरूले पनि यस्तै अनुपातमा शो निर्धारण गरेका छन्।

सोमबार आयोजित प्रिमियरमा चलचित्रले उत्तम प्रतिक्रिया पाएको निर्माण टिमको दाबी छ। चलचित्रले उठाएको विषयवस्तु, मेकिङ, प्रस्तुति र कलाकारहरूको अभिनयको खुलेर प्रशंसा गरिएको थियो। धेरै दर्शकले “हेर्नै पर्ने सिनेमा” भन्दै प्रतिक्रिया दिएका छन्।

सुशान्त गौतम निर्देशित ‘अभिमन्यु : च्याप्टर १’ का क्रिएटिभ निर्देशक मदन थापा हुन्।चलचित्रको लेखन मुकेश खनालले गरेका छन्।

निर्माणतर्फ विनोद पौडेल र गुञ्जन गिरी निर्माता हुन्। सह-निर्मातामा रमेश चौलागाईं र हरि श्रेष्ठ रहेका छन्। कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ छन्।
लाइन प्रोड्युसर जीवन शाक्य हुन्।

यसमा शरद महतोको सिनेमाटोग्राफी (DOP), मनोज श्रेष्ठको VFX, जुनिम गहतराजको रंग संयोजन र मदन घिमिरेको सम्पादन रहेको छ।‘अभिमन्यु : च्याप्टर १’ नेपाली र हिन्दी दुवै भाषामा नेपालभर र विश्वव्यापी रूपमा प्रदर्शन हुने भएको छ।

बुधबार, मङि्सर १७, २०८२ मा प्रकाशित