प्रदर्शनको ७५औं दिनमा ‘परान’ ले ल्यायो टिकट छुट अफर

नमस्ते चितवन

मङ्गलबार, पुष २९, २०८२ मा प्रकाशित

काठमाडौं । नेपाली फिल्म ‘परान’ ले आज आफ्नो प्रदर्शनको ७५ औं दिन पूरा गरेको छ । यस अवसरमा निर्माण टिमले दर्शकका लागि टिकटमा ७५ रुपैयाँ छुटको व्यवस्था गरेको छ ।

फिल्मका निर्माता रञ्जित आचार्यका अनुसार ‘परान’ हेर्न छुटाउनुभएका दर्शकलाई लक्षित गर्दै ७५ औं दिनको सेलिब्रेशनसँगै यो छुट योजना ल्याइएको हो । “परान हेर्न बाँकी रहनुभएका आदरणीय दर्शकहरूलाई यो अवसरमा सिनेमा हेर्न आग्रह गर्दछु,” उनले भने ।

यो छुट केही दिनका लागि मात्र लागू हुने बताइएको छ । निर्माता आचार्यका अनुसार उक्त सुविधा खल्ती एपमार्फत टिकट काट्ने दर्शकहरूका लागि मात्र उपलब्ध हुनेछ । खल्ती एप प्रयोग गरी टिकट खरिद गर्दा ७५ रुपैयाँ क्यासब्याक प्राप्त गर्न सकिनेछ ।

आज (मंगलबार) काठमाडौंमा मात्रै ‘परान’ का पाँच शो प्रदर्शन भएका थिए भने खल्ती एपमा भोलिका लागि छ शो उपलब्ध रहेका छन् ।

यसै अवसरमा फिल्मका कलाकार तथा निर्माण टिमले आज साँझ सिटी स्क्वायरमा अपराह्न ४ बजेको शो हेर्न आएका दर्शकहरूसँगै केक काटेर ७५ औं दिनको उत्सव मनाउने कार्यक्रम पनि राखिएको छ ।

चलचित्र विकास बोर्डले सार्वजनिक गरेको तथ्यांकअनुसार ‘परान’ ले पछिल्लो शनिबार अर्थात् ७२ औं दिनसम्म १७ करोड ७४ लाख २२ हजार १९० रुपैयाँको ग्रस कलेक्सन गरेको छ ।

फिल्मलाई दीपकप्रसाद आचार्य (काकु) ले निर्देशन गरेका हुन् । आचार्यकै कथामा आधारित फिल्मको पटकथा तथा संवाद यम थापाले तयार पारेका हुन् । देशकै प्रतिष्ठित व्यावसायिक घराना गोल्छा समूह र प्रिज्मा समूहको साझेदारीमा स्थापना भएको बाइस्कोप सिनेमा प्रा.लि. ले फिल्म निर्माण गरेको हो ।

फिल्ममा वरिष्ठ कलाकार नीर शाह, मदनकृष्ण श्रेष्ठ, पूजा चन्द, महेश त्रिपाठी, अञ्जना बराइली, केकी अधिकारी, प्रवीण खतिवडा, बुद्धि तामाङ, यासेली योङहाङ, बबिन राई, पुष्पराज ओझा, सीमा काफ्ले, दमन रुपाखेती, यमन श्रेष्ठ, सुब्रतराज आचार्य, सुरेश थापा, बिनोद राई तथा बाल कलाकार आर्यादीप आचार्यलगायतको अभिनय रहेको छ ।

मङ्गलबार, पुष २९, २०८२ मा प्रकाशित