काठमाडौं । चरित्र अभिनेता माओत्से गुरुङको निर्देशनमा निर्माण भइरहेको सिनेमा ‘पेन्सन पट्टा’को सम्पूर्ण छायांकन सम्पन्न भएको छ। कास्कीस्थित एक रिसोर्टमा मंगलबार ३३ दिनको छायांकनपछि सिनेमाको इन्डक्ल्याप गरिएको हो।
छायांकन सम्पन्न भएको जानकारी दिँदै निर्देशक गुरुङले कठिन परिस्थितिमा पनि रातदिन खटिएर काम गर्ने सम्पूर्ण कलाकार तथा प्राविधिक टिमप्रति आभार व्यक्त गरे। उनले सहकार्य र मेहनतकै कारण छायांकन सफलतापूर्वक पूरा भएको बताए।
हालसम्म सिनेमाको प्रदर्शन मिति तय गरिएको छैन। निर्देशक गुरुङका अनुसार अब केही दिनभित्रै पोस्ट–प्रोडक्सनको काम सुरु हुनेछ।
“पोस्ट–प्रोडक्सनमा कति समय लाग्छ, त्यसको आधारमा रिलिज मिति घोषणा गरिनेछ,” उनले भने, “हामी दर्शकलाई सुन्दर सिनेमा देखाउन चाहन्छौं। त्यसैले कुनै पनि सम्झौता नगरी काम गर्दैछौं, समय जति लाग्छ लागोस्।”
माओत्से गुरुङ फिल्म्सको ब्यानरमा निर्माण भइरहेको सिनेमामा स्वयं निर्देशक गुरुङको पनि लगानी रहेको छ। सिनेमामा दयाहाङ राई, सुनिल थापा, पशुपति राई, गौमाया गुरुङ, बुद्धि तामाङ, विल्सन विक्रम राई, राज थापा (काउछा), लुनिभा तुलाधर, विश्वास गुरुङ, माया गुरुङ, यासिली राईलगायत कलाकारहरूको अभिनय रहेको छ।
शीर्षकले भूतपूर्व लाहुरेको कथाको झल्को दिए पनि सिनेमा लोभी केटा कसरी दानी बन्छ भन्ने कथावस्तुमा आधारित रहेको निर्देशक तथा निर्माता गुरुङले बताएका छन्। सिनेमाको कथा पनि उनले स्वयं लेखेका हुन्।
मीन कोन्मे गुरुङ (सिकलेस), भोजबहादुर गुरुङ (युके) र सपना गुरुङको लगानी रहेको सिनेमाका प्रोडक्सन म्यानेजर डिबी गुरुङ हुन्। सुशन प्रजापतिले छायांकन गरेको सिनेमाको कास्टिङ डिरेक्टर सुरज तमु हुन् भने संगीत झुमा लिम्बु, मनोज थापा मगर र शिव बराइलीले तयार पारिरहेका छन्।
निर्देशक माओत्से गुरुङको डेब्यु निर्देशन रहेको सिनेमा ‘दयारानी’ बक्सअफिसमा सफल भएको थियो। चरित्र अभिनेताको रूपमा दर्शकमाझ लोकप्रिय उनी पछिल्लो समय लेखन, निर्देशन र निर्माणमा समेत सक्रिय देखिँदै आएका छन्। यसअघि उनले गुरुङ भाषाका चलचित्रहरू निर्देशन गरेका थिए।सिनेमा ‘पेन्सन पट्टा’लाई रोहित कट्टेल र रत्न श्रेष्ठको आरआर फिल्म्सले देशव्यापी रूपमा वितरण गर्नेछ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.