“पात्रलाई बुझ्न, एक्सप्लोर गर्न र आफूमा उतार्न निर्देशकसँग लामो समय काम गरेँ। अहिले फिल्म रिलिजको संघारमा आइपुग्दा निकै उत्साहित छु,” उनले भनिन्।

फिल्मको सुरुआतमा कलाकारको रूपमा मात्रै स्क्रिप्ट सुनेर आबद्ध भएकी आना पछि निर्देशक सुदिप्ता र निर्माता सागर लम्साल सँग नजिकबाट काम गर्दै कार्यकारी निर्माताको जिम्मेवारी सम्म पुगेकी थिइन्।

“सानो कोर टिम थियो। दैनिक मिटिङ, वर्कसप हुँदै निर्णय प्रक्रियामा सँगै पुग्यौँ। निर्माता सागरजीले ममाथि विश्वास गरेर एक्जिक्युटिभ प्रोड्युसरको जिम्मेवारी दिनुभयो, जुन मेरो लागि ठूलो सिकाइ बन्यो,” आनाले अनुभव सुनाइन्।

फिल्मले विशेषगरी युवा पुस्ता र युवतीहरूलाई लक्षित गर्दै आत्ममूल्य, आत्ममाया र आत्मसम्मानको सन्देश दिने उनको विश्वास छ।

“पहिला आफूलाई माया गर्नुपर्छ, आफूलाई केयर गर्नुपर्छ, अनि मात्र अरूलाई माया दिन सकिन्छ भन्ने सन्देश फिल्मले दिन्छ,” उनले भनिन्।

फिल्ममा सोसल मिडियाको प्रभाव, बाह्य स्वीकृतिको खोजी र त्यसले मानसिक स्वास्थ्यमा पार्ने असर पनि चित्रण गरिएको छ। रमिताको पात्र एक चरणमा अरूको स्वीकृतिमा निर्भर हुने देखाइन्छ, जुन आजको पुस्तासँग गहिरो रूपमा सम्बन्धित रहेको आनाको भनाइ छ।

फिल्ममा समीर श्रेष्ठ र आना शर्माले निभाएका पात्रबीचको प्रेम सम्बन्धलाई गीतमार्फत प्रस्तुत गरिएको छ, जसले प्रेमको सुरुआती चरण र भावनात्मक कनेक्सनलाई उजागर गर्छ।