यस वर्ष पनि किसान कृषि मन्त्रालय मै पुगेर केराको आयात रोक्नुपर्ने माग गरेका थिए । सोही समय भारतमा केरामा लाग्ने टि आर फोर नामक रोगको प्रकोप फैलिएपछि केरा आयात पूर्णरूपमा बन्द भएको अध्यक्ष विकले बताउनुभयो ।

भारतबाट आयात बन्द भएपछि बर्दियामा केरा खेती थप विस्तार हुने सम्भावना बढेको छ । केरा किसान टीकाकुमारी सम्सेली मगरले नेपाली केराले नै बजारको माग धान्ने बनाउनका लागि थप खेती विस्तार तर्फ लागेको बताउनु भयो ।

उहाँले भन्नुभयो,“अब केराको बजार मूल्यको चिन्ता भएन अरु किसानलाई पनि केरा खेती गर्न प्रेरित गरिरहेका छौँ । किसानलाई सङ्गठित बनाएर सामूहिक रूपमा केरा खेती गर्ने सोच बनाएका छौँ ।”

किसानले यस वर्ष केरा खेती थप गर्न थालेको केरा किसान तथा व्यवसायी शम्भुप्रसाद अधिकारीले बताउनुभयो । उहाँले भन्नुभयो,“किसान केरा खेती तर्फ थप आर्कषित भएका छन् । अब केरा खेतीको क्षेत्रफल बढ्ने सम्भावना रहेको छ ।”बर्दियामा केरा खेती विस्तार सँगै व्यवस्थित हुँदै गएको छ । केरा पकाउने र स्टोर गर्न मिल्ने च्याम्बर, टिस्युकल्चर केरा नर्सरी, केराको थामबाट रेसा निकाल्ने उद्योग स्थापना भएका छन् ।