सुस्ताएको नेपाली फिल्म बजारमा पल शाह, विपना थापा, प्रदीप रावत र निर्देशक चन्द्र पन्तको टिमको मेहनतले ‘आ बाट आमा’ले दर्शकको मन जित्न सफल भएको विश्लेषण गरिएको छ। अधिकांश हलमा हाउसफुल चलिरहेको फिल्मले आगामी हप्तामा अझ राम्रो व्यापार गर्ने अनुमान गरिएको छ।

यतिबेला अभिनेता पल शाह, सिम्रन पन्त, उषा उप्रेतीसहित निर्देशक चन्द्र पन्तको टिम दर्शक भेटघाटका लागि दाङ र नेपालगञ्जका हलहरूमा पुगेर प्रत्यक्ष प्रतिक्रिया संकलन गरिरहेको छ।

चन्द्र पन्तकै कथा तथा निर्देशनमा बनेको यस फिल्ममा विपना थापा, पल शाह, प्रदीप रावत (गजनी भिलेन)सँगै साइग्रेस पोखरेल, उषा उप्रेती, सिम्रन पन्त, गजित बिष्ट, बेगम नेपाली र रचना गौतमको अभिनय रहेको छ।

आर्या इन्टरटेन्मेन्टको प्रस्तुतिमा बनेको फिल्मका निर्माता कृष्णप्रसाद सुवेदी, ओमकार पन्त, प्रकाशजंग कुँवर, ध्रुवप्रसाद न्यौपाने र क्षितिज ढुंगाना हुन् भने कार्यकारी निर्माता करण सिंह रसाली रहेका छन्।
फिल्मको छायांकन नवराज उप्रेती, सम्पादन मिलन श्रेष्ठ, र वितरण आरआर फिल्म्सले गरेको हो। डिजिटल अधिकार ओएसआर डिजिटलसँग सुरक्षित छ।