१४० शोजसहित ‘राम नाम सत्य’को अग्रिम बुकिङ खुला

नमस्ते चितवन

बिहिबार, चैत २६, २०८२ मा प्रकाशित

काठमाडौं, चैत्र २६
भोलि शुक्रबारदेखि प्रदर्शनमा आउन लागेको चलचित्र राम नाम सत्य को अग्रिम टिकट बिक्री सुरु भएको छ। देशभरका मल्टिप्लेक्स र सिंगल स्क्रिन हलहरूले बुधबारदेखि बुकिङ खुला गरेका हुन्।

प्रदर्शनअघि नै चलचित्रले करिब १४० शोज पाएको छ, जसले फिल्मप्रति दर्शकको उत्साह उच्च रहेको देखाएको छ।

देशकै ठूलो मल्टिप्लेक्स चेन क्यूएफएक्समा ‘राम नाम सत्य’ले ५९ शो पाएको छ । क्यूएफएक्सले काठमाडौं उपत्यकाको आफ्ना आउटलेटमा २७ र काठमाडौं बाहिरका सहरमा ३२ शो उपलब्ध गराएको छ ।

आईएनआईले देशभरका आफ्ना ६ वटा आउटलेटमा २३ शो दिएको छ । ‘राम नाम सत्य’मा विराज भट्ट, सुशील श्रेष्ठ, आयुष सिंह ठकुरी, सुपुष्पा भट्ट, दिव्या रायमाझी, सुनील थापा, प्रशान्त ताम्राकारलगायत कलाकारको अभिनय छ ।

निर्देशक माइकल चन्द को लेखन तथा निर्देशनमा तयार भएको यो एक्सन–ड्रामा फिल्म समसामयिक विषयवस्तुमा आधारित रहेको छ।

चलचित्रमा उपेन्द्र शाही र स्वेता विमलीको लगानी छ । कार्यकारी निर्मातामा किशोर भट्ट, राजेन्द्र भट्ट र अर्जुन सुनार छन् । सह–निर्माता तेजराज चटौत र दमनबहादुर चन्द सह–निर्माताको रुपमा रहेका छन् ।

मानकृष्ण महर्जनको डीओपी रहेको चलचित्रमा श्री श्रेष्ठको एक्सन, बन्दे प्रसादको सम्पादन छ । ‘राम नाम सत्य’ चैत २७ गतेबाट रिलिज हुँदै छ ।१५७ मिनेट लामो यस चलचित्र पीजी सर्टिफिकेट पाएको छ । यसको अर्थ, बालबालिकाले अभिभावकको निगरानीमा मात्र यो फिल्म हेर्नुपर्नेछ।