पत्रकारलाई नेपाली सेनाको प्रशिक्षण

नमस्ते चितवन

शनिबार, जेठ २८, २०७९ मा प्रकाशित

जेठ २८ , पर्वत ।सैनिक जनसम्पर्क निर्देशनालयले मध्य कमाण्ड हेडक्वार्टर जिल्ला अन्तर्गतका पत्रकारलाई एक हप्ताको प्रशिक्षण दिएको छ।मध्य कमाण्डअन्तर्गतका ३१ जिल्लाका २५ पत्रकारलाई रक्षा संवाददाता अभिमुखीकरण तालिम (डीसीओपी) तालिम दिएको हो। मध्य कमाण्ड हेडक्वार्टर रहेको विजयपुर ब्यारेक पोखरामा सुरु भएको प्रशिक्षण बुटवलस्थित २२ नम्बर अड्डा योगीकुटी मा पुगेर सम्पन्न भयो।

जेठ २२, २३ र २४ गते तीन दिनसम्म विजयपुर ब्यारेक पोखरामा भएको आन्तरिक प्रशिक्षणपछि २५, २६ र २७ गते स्थलगत भ्रमण सहितको तालिम सञ्चालन भएको हो। स्थलगत भ्रमणको क्रममा तनहुँ हाइड्रोपावर, पोखरामा रहेको अन्तर्राष्ट्रिय पर्वतीय सङ्ग्रहालय, पाल्पा दरबार, पाल्पा निशान भगवती, कालभैरव, रानी महल, रुपन्देहीको लुम्बिनी र जितगढी लगायत स्थानमा अवलोकन गराइएको थियो।

नेपाल एकीकरणको बेलामा पृथ्वीनारायण शाहले प्रयोग गरेका सेनादेखि नेपाल–अङ्ग्रेज युद्धको बेलामा नेपालका विभिन्न ठाउँमा भएका आक्रमणबारे पनि जानकारी दिइएको थियो।

पोखरामा भएको आन्तरिक प्रशिक्षणमा राष्ट्रिय सुरक्षा नीति, सूचनाको हक, कम्ब्याट फोर्स, शान्ति स्थापनामा नेपाली सेनाको भूमिका, सैनिक कल्याणकारी कोष, भौतिक पूर्वाधार निर्माणमा सेनाको भूमिका, विपद् व्यवस्थापन, पत्रकार आचारसंहिता लगायत विषयमा प्रशिक्षण दिइएको थियो। रक्षा मन्त्रालयका उपसचिवसहित नेपाली सेनाका अधिकृतले प्रशिक्षण दिएका थिए।

प्रशिक्षण समापन कार्यक्रममा २२ नम्बर अड्डाका बाहिनीपति सहायक रथी, बाहिनीपति नवराज गुरुङले सञ्चारकर्मी र नेपाली सेनाबीच रहेको कुशल सम्बन्ध झनै मजबुत बन्ने विश्वास व्यक्त गरे। मध्य कमाण्ड हेडक्वार्टरका उपरथी बाबुराम श्रेष्ठले राष्ट्रको चौथो अङ्ग र नेपाली सेनाबीचको सम्बन्ध थप बलियो हुनुपर्ने धारणा राखे।