कांग्रेस-एमाले गठबन्धनले राज्यको दोहन गरिरहेको छ : माधव सापकोटा

नमस्ते चितवन

मङ्गलबार, भदौ ११, २०८१ मा प्रकाशित

प्रमुख प्रतिपक्षी दल नेकपा माओवादी केन्द्रका सांसद माधव सापकोटाले कांग्रेस–एमालेको सत्तारुढ गठबन्धनले मुलुकमा राज्यशक्तिको दोहन गरिरहेको आरोप लगाउनु भएको छ ।

मंगलवार प्रतिनिधिसभा बैठकको शून्य समयमा उहाँले यस्तो आरोप लगाउनु भएको हो । प्रदेशमा मन्त्री र राज्यमन्त्रीहरु बढाउने दुई ठूला दलको गठबन्धनले राज्य शक्तिको दोहन गरिरहेको स्पष्ट देखिएको बताउनु भयो ।

‘कर्णाली प्रदेशमा गरिएको एक सर्भेक्षणले के देखाउँछ भने एउटा मन्त्रालय बढाउँदा वार्षिक १० करोड बराबरको लागत बढन जान्छ‚’ सांसद सापकोटाले भन्नु भयो, ‘यसरी हेर्दा आन्तरिक आम्दानीले साधारण खर्च धान्न नसकेको देखिएको छ। समग्रमा हेर्दा दुई ठूला पार्टीको गठबन्धन राज्यशक्तिको दोहनका लागि भएको भन्ने स्पष्ट छ।’

उहाँले ‘संघमा दुई ठूला दल मिलेर सरकार बनेको झन्डै २ महिना पुग्न लाग्यो तर प्रदेश सरकारहरुको अवस्था हेर्दा यो समीकरणको धरातल उदांगो भएको छ‚’ सांसद सापकोटाले भने, ‘कोशीमा सरकारले अझै पूर्णता पाउन सकेको छैन‚ गण्डकीमा ७ वटा मन्त्रालय छन्‚ १० वटाको छलफल चलिराखेको छ। कर्णालीमा एक मन्त्री थपियो। बागमतीमा मन्त्रालयको टुंगो नलागीकन विना विभागीय मन्त्रीहरुको शपथ छ।’