कोरिया पठाउन ढिलाइ गरेको भन्दै आन्दोलन

नमस्ते चितवन

बुधबार, पुष २४, २०८१ मा प्रकाशित

रोजगार अनुमति प्रणाली (ईपीएस) मार्फत भाषा परीक्षा पास गरे पनि कोरिया पठाउन ढिलाइ गरेको भन्दै आन्दोलन सुरु भएको छ । भाषा परीक्षा पास गरेको एक वर्ष बितिसक्दा समेत दक्षिण कोरिया जान नपाएकाहरू आन्दोलनमा उत्रिएका हुन् ।

दक्षिण कोरियाले एचआरडी कोरियामार्फत सन् २०२३ मा सिप बिल्डिङ क्षेत्रका लागि ईपीएस मार्फत कामदार माग गरेको थियो, जसमा ३५ हजार नेपालीले आवेदन दिएका थिए । तीमध्ये चार हजार जनालाई भाषा परीक्षामार्फत छनोट गरिएको थियो । छनोट भएकामध्ये हालसम्म ३१४ जनामात्रै कोरिया पुगेको ईपीएस कोरिया शाखाले जनाएको छ । थप ४७८ जनाको एलसी जारी भएको छ ।

एक वर्षदेखि कुरेर बस्दासमेत कोरिया जान नपाएको भन्दै भाषा परीक्षा पास गरेकाहरूले ग्वार्कोमा रहेको ईपीएस कार्यालय घेराउ गरेका छन् । उनीहरूले शाखाका निर्देशक राजकुमार राईलाई ध्यानाकर्षण पत्र समेत बुझाएका छन् ।

‘नलैजाने भए पास किन गरेको ३५०० जनाको भविष्यमाथि खेलवाड गर्न पाइँदैन । ६ पटकसम्म ज्ञापनपत्र बुझाउँदा कुनै सुनुवाइ भएको छैन । हरेक पटक ईपीएस कार्यालय प्रमुखलाई भेट्न जाँदा चाँडै हुन्छ भनेर सान्त्वना दिने काममात्रै भयो । तर, कहिले जान पाउने टुङ्गो भएन,’ भाषा पास गरेर कोरिया जाने तयारीमा रहेका एक युवाले भने ।

उनीहरूले पछिल्लो पटक मंसिर १० गते ज्ञापनपत्र बुझाएका थिए । त्यो बेला ईपीएस कोरिया शाखाका निर्देशक राईले एक हप्ताभित्र माग सम्बोधन गरिने आश्वासन दिएको ती युवाले बताए । तर, एक महिनाभन्दा बढी समय बितिसक्दा पनि कुनै पहल नभएपछि बाध्य भएर आन्दोलन गर्नुपरेको उनको भनाइ छ ।

नलाने हो भने पास किन गरेको भन्दै उनले अब रोष्टर परिवर्तनको सुविधा दिनुपर्ने बताएका छन् ।