कोटेश्वर अन्डरपास तथा फ्लाइओभरकालागि बत्तिस अर्ब ऋण लिने सम्झौता

नमस्ते चितवन

बिहिबार, मङि्सर १८, २०८२ मा प्रकाशित

सङ्घीय राजधानी काठमाडौँको एउटा चोक सुधार गर्न सरकारले करिब ३२ अर्ब रुपियाँ ऋण लिने भएको छ । राजधानीको कोटेश्वर चोक सुधार आयोजनाका लागि सरकारले ३१ अर्ब ७६ करोड रुपियाँ वैदेशिक ऋण लिने भएको हो । चोक सुधारका लागि नेपाललाई जापान सरकारले ऋण उपलब्ध गराउने भएको हो ।

ऋण उपलब्ध गराउने सम्बन्धमा दुई देशका सरकारी प्रतिनिधिबिच बुधबार अर्थ मन्त्रालयमा आयोजित एक कार्यक्रममा सम्झौता भएको छ । सम्झौता अनुसार जापान सरकारले नेपाललाई उल्लेखित नेपाली रुपियाँ बराबर हुन आउने ३४ अर्ब ५९ अर्ब जापानी येन ऋण उपलब्ध गराउने छ । जापान सहयोग नियोग (जाइका) मार्फत प्राप्त हुने उक्त ऋणको भुक्तानी अवधि ३० वर्षको हुने छ । ऋणको ब्याजदर भने ०.२ प्रतिशत मात्रै रहने सम्झौतामा उल्लेख छ ।

आयोजना अन्तर्गत कोटेश्वर तथा जडीबुटी खण्डमा अन्डरपास तथा फ्लाइओभर निर्माण गरिने छ । यो निर्माणपछि काठमाडौँ, ललितपुर, भक्तपुर तथा बिपी राजमार्ग हुँदै सञ्चालन हुने सवारी साधनको आवागमन सहज हुने तथा ट्राफिक जाम न्यूनीकरण हुने अपेक्षा गरिएको छ । आयोजना भौतिक पूर्वाधार तथा यातायात मन्त्रालय अन्तर्गतको सडक विभागले कार्यान्वयन गर्ने छ ।

ऋण सम्झौतासम्बन्धी औपचारिक कार्यक्रममा अर्थमन्त्री रामेश्वरप्रसाद खनालले काठमाडौँ उपत्यकाको महत्वपूर्ण जामयुक्त स्थानको सुधारमा प्रगति ल्याउन यो आयोजना अघि बढाइएको बताउनुभयो । यस आयोजनाले राजधानीको यातायात व्यवस्थापनमा दीर्घकालीन परिवर्तन ल्याउने उहाँको भनाइ थियो ।

नेपालका लागि जापानका राजदूत मायदा तोरुले जापानको सहुलियतपूर्ण ऋण सहयोगमा कार्यान्वयन हुने कोटेश्वर चोक सुधार आयोजना कार्यान्वयनबाट उपत्यकाको यातायात व्यवस्थामा उल्लेख्य सुधार हुने बताउनुभयो ।

ऋण सहायतासँग सम्बन्धित ‘एक्सचेन्ज अफ नोट्स’ मा अर्थ मन्त्रालयका सचिव डा. घनश्याम उपाध्याय र राजदूत तोरुले हस्ताक्षर गर्नुभएको छ । ऋण सम्झौतामा भने अर्थ मन्त्रालयको अन्तर्राष्ट्रिय आर्थिक सम्बन्ध महाशाखा प्रमुख सहसचिव डा. धनीराम शर्मा र जाइका नेपालका प्रमुख प्रतिनिधि मित्सुजाकी माजुकीले हस्ताक्षर गर्नुभयो ।

सार्वजनिक ऋण व्यवस्थापन कार्यालयका अनुसार नेपालले तिर्नुपर्ने सार्वजनिक ऋण २७ खर्ब २९ अर्ब रुपियाँ पुगेको छ, जुन नेपालको कुल अर्थतन्त्रको ४४ प्रतिशत बराबर हुन आउँछ । कुल ऋणमध्ये १४ खर्ब ५३ अर्ब रुपियाँ वैदेशिक ऋणको दायित्व छ ।

बिहिबार, मङि्सर १८, २०८२ मा प्रकाशित