चलचित्र ‘फ्रेन्च किस’ निर्माण घोषणा, अर्पण थापाको निर्देशनमा थिन्ले ल्हामो मुख्य भूमिकामा

नमस्ते चितवन

शनिबार, माघ १०, २०८२ मा प्रकाशित

काठमाडौं । नेपाली चलचित्र ‘फ्रेन्च किस’ (French Kiss) निर्माण हुने भएको छ। ए.टी.एफ. प्रोडक्सन प्रा.लि.को ब्यानरमा निर्माण हुन लागेको यस चलचित्रको वसन्तपञ्चमी (सरस्वती पूजा) को शुभ अवसर पारेर शुक्रबार काठमाडौंको कमलादीस्थित गणेश मन्दिरमा औपचारिक घोषणा तथा शुभमुहूर्त गरिएको हो।

नेपाली चलचित्र क्षेत्रमा फरक शैली र धारका चलचित्र निर्देशनका लागि परिचित अभिनेता अर्पण थापाले आफ्नो नयाँ निर्देशन प्रोजेक्ट ‘फ्रेन्च किस’को औपचारिक घोषणा गरेका हुन्। यस चलचित्रको निर्देशन स्वयं थापाले गर्नेछन् भने उनी मुख्य भूमिकामा पनि देखिनेछन्।

चलचित्रको छायांकन सोमबारदेखि चितवनका विभिन्न स्थानमा सुरु हुने निर्माण पक्षले जनाएको छ। अर्पण थापासँगै अन्तर्राष्ट्रिय स्तरमा चर्चा कमाएको चलचित्र ‘शाम्बाला’बाट चर्चामा आएकी अभिनेत्री थिन्ले ल्हामो मुख्य भूमिकामा रहनेछिन्।

अभिनेत्री थिन्ले ल्हामोले यसअघि स्विट्जरल्यान्डमा सम्पन्न ७७औँ लोकार्नो फिल्म फेस्टिभलमा उत्कृष्ट अभिनयका लागि प्रतिष्ठित ‘बोक्कालिनो डिओर’ अवार्ड जितेकी थिइन्। यो चलचित्रमार्फत थिन्ले र भर्सटायल अभिनेता अर्पण थापाको अनस्क्रिन जोडी पहिलो पटक देखिन लागिएको हो।

चलचित्रमा अभिनेत्री गौरी मल्ल र आयशा तामाङको पनि मुख्य भूमिका रहनेछ। यस फिल्मका कार्यकारी निर्माता सौगात बस्नेत र सह–निर्माता सुभाष बी. शाही हुन्। चलचित्रको छायांकन अनुभवी सिनेमेटोग्राफर सुदीप बरालले गर्नेछन्।

चलचित्रको संगीत चर्चित गायक तथा संगीतकार दीपक बज्राचार्यको रहनेछ। रोयल भीमसेन (ट्राइडेन्ट कन्सेप्ट) ले फिल्मको पब्लिसिटी डिजाइनको जिम्मेवारी सम्हालेको छ।

‘फ्रेन्च किस’लाई सन् २०२६ भित्र प्रदर्शनमा ल्याउने लक्ष्य राखिएको निर्माण पक्षले जनाएको छ। शीर्षकले नै संकेत गरेअनुसार यो चलचित्र युवा पुस्ता र प्रेमकथामा आधारित हुने अनुमान गर्न सकिन्छ। अभिनय र निर्देशन दुवैमा आफ्नै बेग्लै पहिचान बनाएका अर्पण थापाको यो नयाँ चलचित्रले नेपाली दर्शकलाई फरक स्वाद र नयाँ अनुभव दिने अपेक्षा गरिएको छ।

शनिबार, माघ १०, २०८२ मा प्रकाशित