सङ्गीतप्रति युवाको अपेक्षा स्पष्ट देखिएको थियो। उनीहरूले भने,
“गीतमा हिरो–हिरोइनको लुक्सभन्दा भावना चाहिन्छ। सङ्गीत मनोरञ्जनका लागि मात्र होइन, जीवनसँग जोडिन सक्नुपर्छ।”

चलचित्र ‘कुमारी’को चर्चित गीत ‘डोको बुन्ने’ ले सङ्गीतको मौलिक ‘एसेन्स’ बोकेको भन्दै युवाहरूले खुलेर प्रशंसा गरे।

चलचित्रका अभिनेता अभिषेक खड्का ले आफू पनि पहिले पश्चिमा चलचित्रबाट बढी प्रभावित भए तापनि पछिल्लो समय नेपाली चलचित्रले उल्लेखनीय फड्को मारेकोमा खुसी व्यक्त गरे। उनले आफूले डेब्यु गरेको चलचित्र ‘कुमारी’ पछिल्लो पुस्ताले खोजेको स्वाद बोकेको बताउँदै ढुक्कसँग हलमा गएर हेर्न आग्रह गरे।

सञ्चारकर्मी नरेश भट्टराई ले युवालाई मिडिया तथा सामाजिक सञ्जालमा देखिने सबै सामग्री सजगतापूर्वक बुझेर मात्र विश्वास गर्न सुझाव दिए।
लेखक अमर न्यौपाने ले साहित्य र सिनेमाबीचको सम्बन्ध स्पष्ट पार्दै भने,
“किताब कलमले लेखिएको साहित्य हो भने, सिनेमा क्यामेराले लेखिएको साहित्य हो।”

चलचित्रका लेखक विकास सुवेदी ले युवामा देखिने निराशा देशका लागि घातक हुने धारणा राखे। उनले चलचित्र ‘कुमारी’ ले नेपाली चलचित्रप्रतिको केही हदसम्मको निराशा हटाउने विश्वास व्यक्त गरे।
उनले भने,
“आवरण धेरैको मिल्न सक्छ तर भित्री कुरा फरक हुन्छ। ‘कुमारी’ सामान्य प्रेमकथा होइन। बाहिर देखिएजस्तो मात्र यो चलचित्र होइन, ट्रेलरमै सबै कुरा सकिँदैन।”

निर्देशक दिनेश राउत को निर्देशनमा बनेको चलचित्र ‘कुमारी’ बाट अभिषेक खड्का र आकृति राजभण्डारी ले मुख्य भूमिकामा डेब्यु गरेका छन्। उनीहरूसँगै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने र मनषा शर्मा लगायत कलाकारहरूको अभिनय रहेको छ।

विनिश इन्टरटेन्मेन्ट को ब्यानरमा निर्माण भएको चलचित्रको कथा तथा पटकथा विकास सुवेदी ले लेखेका हुन्। छायाङ्कन सुसन प्रजापति, सम्पादन तथा कलर ग्रेडिङ सुप्रिम पराजुली र साउन्ड डिजाइन उत्तम न्यौपाने ले गरेका छन्। पोस्टर तथा पब्लिसिटी डिजाइन रोयल भीमसेन को रहेको छ भने कार्यकारी निर्माता केदार भुसाल हुन्।

चलचित्रका गीतहरू ‘डोको बुन्ने’, ‘कता छौ मेरो फूल’ र ‘तिमी बिना’ ले दर्शकमाझ राम्रो चर्चा पाइसकेका छन्। विशेषगरी ‘डोको बुन्ने’ गीतले युट्युबमा ७२ लाखभन्दा बढी भ्युज प्राप्त गरिसकेको छ। चलचित्रका सबै गीतमा केहर सिंह लिम्बु को स्वर रहेको छ।

प्रेमकथामा सफल पहिचान बनाइसकेका निर्देशक दिनेश राउत सामाजिक विषयपछि पुनः प्रेम कथामा फर्किएको चलचित्र ‘कुमारी’ ले स्वदेश तथा विदेशका दर्शकको मन जित्ने अपेक्षा गरिएको छ।