प्रचण्डले ‘ट्याक्टिस’ प्रयोग गरेर ओलीको निरंकुश बन्ने सपना तोडियो :नारायण दाहाल

"माओवादी केन्द्र भरतपुरले गर्यो शहिद तथा वेपत्ता परिवारलाई सम्मान "

नमस्ते चितवन

आइतबार, फागुन १४, २०७९ मा प्रकाशित

फागुन १४ , भरतपुर । माओवादी केन्द्रका स्थायी समिति सदस्य तथा राष्ट्रिय सभा सदस्य नारायण दाहालले प्रचण्डले ‘ट्याक्टिस’ प्रयोग गरेर ओलीको निरंकुश बन्ने सपना तोडिएको बताएका छन् । माओवादी केन्द्र भरतपुर महानगरले आयोजना गरेको शहिद तथा वेपत्ता परिवार सम्मान कार्यक्रममा बोल्दै उनले एमाले अध्यक्ष ओलीले फेरी प्रतिनिधिसभा विघटन गरेर आँफु सही भन्ने प्रमाणित गर्ने बाटो खोजिरहेको बताए । “२ वर्षपछि केपी प्रधानमन्त्री बन्ने कुरा थियो, अहिले राष्ट्रपतिपनि एमालेबाटै, सभामुख, निर्वाचन आयुक्त, अख्तियार लगायतका संवैधानिक आयोगहरु सबै हातमा लिएर ओलीले सदन विघटन गर्नेवाला थिए”, उनले भने, “मासु कुर्न राखेको कुकुर, दूध कुर्न राखेको विरालो जस्तो हुनेवाला देखेरै त्यो रोक्न नयाँ गठबन्धनमा जानु परेको हो ।”

एमालेले राष्ट्रपति पाएमा थप निरंकुश बन्ने बाटोमा जाने संकेतहरु देखापरेपछि माओवादीले राष्ट्रिय सहमतिको कुरा निकालेको जीकिर गरे । “लडेर ल्याएको गणतन्त्र, संघीयता, धर्मनिरपेक्षता, संविधानलाई गुम्न दिनेछैनौँ”, उनले भने, “प्रचण्डले रणनीति सधै एउटै तर कार्यनितिमा लचकता ल्याएर अगाडी बढ्नुभएको हो ।” गणतन्त्रको अगुवाई गर्ने दललेनै गणतन्त्रविरोधीहरुसँग मिलेर सरकार बनाउनुपर्ने अवस्था आएपनि अहिले कोर्स सच्चिएको बताए । “सदन विघटनका कुरा, प्रतिगमनका कुरा सदनमा नराख्ने सहमति ओलीले विश्वासको मत लिने दिनमै तोडे”, उनले भने, “त्यही दिनबाट खटपटि सुरु भएको हो, माओवादीलाई सिध्याउने, राजावादीहरुसँग मिल्ने ओलीको लक्ष्यलाई रोकेका हौँ ।”

उनले अहिले बनेको नयाँ गठबन्धनले पछि माओवादीको विचार, सिद्धान्तलाई आघात पु¥याउने काम गरेमा सत्ता छाडेरै सडकमा जनतासँगै उत्रने दाबी गरे । “जनयुद्ध शव्दनै नरुचाउने, हत्या, हिंसा भनेर टिप्पणी गर्नेहरुले चारैतर्फबाट घेराबन्दी गर्न थालेका थिए”, नेता दाहालले भने, “माओवादी आन्दोलन, जनयुद्धलाई अपमान गरेर रोटी सेक्नेहरुसँग सहकार्य हुनेछैन ।” माओवादीका केन्द्रीय सदस्य इश्वरी भट्टराईले जनयुद्धलाई हिंसा दिवस भनेर टिप्प्णी गर्ने एमालेसँगको सम्बन्ध तोड्नु समयको माग भएको बताए ।

सहिदहरुले देखाएको बाटोमा पार्टी कहिल्यै विचलित नहुने बताए । भरतपुर महानगरका मेयर रेनु दाहालले गणतन्त्र विरोधिहरु सल्बल्याएको बताइन् । गणतन्त्र पक्षधरहरु एक ठाउँमा उभिएकाले अब गणतन्त्र विरोधिहरु आँफै पलायन हुने दाबी गरिन् । वर्तमान सरकारले जनयुद्धका सहिदहरुलाई छिटै राष्ट्रिय सहिद घोषणा गरेर परिवारलाई सम्मान तथा सुविधा दिने बताइन् । भरतपुर महानगरले जनयुद्धका सहिद तथा वेपत्ता परिवारलाई मासिक २ हजार सहयोग गर्दै आइरहेको बताइन् । कार्यक्रममा ७० जना बढी चितवनका जनयुद्धका सहिद तथा वेपत्ताका परिवारलाई सम्मान गरिएको थियो ।