ट्रकको ठक्करबाट तनहुँमा तीन जनाको मृत्यु

नमस्ते चितवन

बुधबार, बैशाख २०, २०८० मा प्रकाशित

बैशाख २०, तनहुँ । पृथ्वी राजमार्गअन्तर्गत तनहुँको बन्दीपुर–५ आँधीखोला नजिक आज ट्रकको ठक्करबाट एक बालकसहित तीन जनाको मृत्यु भएको छ ट्रकको ठक्करबाट गम्भीर घाइते भएकाको उपचारको क्रममा पुरानो मेडिकल कलेज भरतपुरमा मृत्यु भएको हो ।

यसरी मृत्यु हुनेमा बन्दीपुर–१ बस्ने १२ वर्षीय आयुस भुजेल, सोही स्थानका ५० वर्षीय चेतबहादुर घर्ती र ६९ वर्षीय सनबहादुर भुजेल रहेको प्रहरीले जनाएको छ ।

जिल्लाको डुम्रेबाट मुग्लिनतर्फ जाँदै गरेको ना४ख १९७३ नम्बरको ट्रक अनियन्त्रित भई सडक छेउमा रहेको सुनमाया भुजेलको घरमा ठोक्किँदा उक्त दुर्घटना भएको हो ।

त्यसैगरी ट्रकको ठक्करबाट घाइते भएका बन्दीपुर–१ बस्ने वर्ष ६ की आयुसा भुजेल, वर्ष १० की जस्मिन भुजेल, वर्ष १० का ईश्वर भुजेल, वर्ष ८ का समिर भुजेल र वर्ष ५ का सन्तोष भुजेलको उपचार भइरहेको छ ।

दुर्घटनाको विषयलाई लिएर पूर्ण रूपमा बन्द रहेको पृथ्वी राजमार्ग दिउँसोदेखि सञ्चालनमा आएको तनहुँका प्रहरी नायब उपरीक्षक मोहनबहादुर खाँणले जानकारी दिनुभयो ।