काठमाडौं । आगामी कात्तिक २६ गतेदेखि प्रदर्शनमा आउने चलचित्र ‘बाटुलो जून’मा समावेश डान्सिङ नम्बर सार्वजनिक भएको छ। अभिनेता अनमोल केसी स्टारर चलचित्रको ‘अल्लारे ठिटो आयो है’ बोलको गीत निर्माण टिमले आइतबार युट्युबमार्फत सार्वजनिक गरेको हो।
सार्वजनिक गीतको भिडियोमा अनमोल केसीसँगै डेब्यू अभिनेत्री प्रिन्सी खतिवडा फिचर्ड छन्। पुरानो नेपाली समाजको मौलिक परिवेशमा छायांकन गरिएको भिडियोमा अनमोल र प्रिन्सीबीचको दोहोरी नोकझोकसँगै आकर्षक प्रेमिल केमेस्ट्री देख्न सकिन्छ।
नजिकिँदो तिहार पर्व र देउसी–भैलोको सांस्कृतिक पक्षलाई लक्षित गर्दै गीत सार्वजनिक गरिएको निर्माण टिमले जनाएको छ।
गीतमा रुबै र प्रविण बेडुवालको स्वर रहेको छ। रूप महानताले संगीत निर्माण, मिक्सिङ तथा मास्टरिङ गरेका छन्। गीतमा पञ्चेबाजा, सारङ्गी, गितार र बाँसुरीको कर्णप्रिय धुन समेटिएको छ।
भुवन केसीको निर्देशनमा सनराइज पिक्चर्स प्रालिको ब्यानरमा बनेको ‘बाटुलो जून’ ३० देखि ४० को दशकको नेपाली परिवेशमा आधारित प्रेमकथानक चलचित्र हो। आदर्श प्रेमलाई केन्द्रमा राख्दै तत्कालीन सामाजिक परिवेश, जीवनशैली र प्रेम गर्ने तौरतरिकालाई पर्दामा उतार्ने प्रयास गरिएको निर्माण टिमले जनाएको छ।
‘बाटुलो जून’ पुरानो समयको कथा मात्र नभई आफ्नै सिनेमायी यात्रासँग पनि जोडिएको चलचित्र भएको निर्देशक केसीले बताउँदै आएका छन्। तत्कालीन समयका लोकप्रिय अभिनेता केसी स्वयं पनि चलचित्रमा महत्त्वपूर्ण भूमिकामा देखिनेछन्।
चलचित्रको लेखनमा सामीप्यराज तिमल्सेनासँग सरिन पोखरेलले सहकार्य गरेका छन्। राजेश श्रेष्ठको छायांकन, कृष्ण भण्डारीको सम्पादन र रोमन बज्राचार्यको पार्श्व संगीत रहेको चलचित्रमा प्रदीप श्रेष्ठ एसोसिएट निर्देशकका रूपमा छन्।
जिया केसी र भविष्य खड्काले निर्माण गरेको चलचित्रका सह–निर्माता विवेक थापा हुन्। यसै चलचित्रमार्फत अभिनेत्री गरिमा पन्तले लामो समयपछि अभिनयमा पुनरागमन गरेकी छन्।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.