“कुस्र्क क्षेत्रको तोकिएको क्षेत्रहरूमा हाम्रो सेनाको अभियान जारी छ”, जेलेन्स्कीले भन्नुभयो, “हाम्रा सैनिकहरूले कुस्र्क क्षेत्रमा रुसी र उत्तर कोरियाली समूहहरूलाई रोकिराखेका छन् । हाम्रा सैनिकहरूको कुनै घेराबन्दी छैन ।”

अर्कै ठाउँमा युक्रेनको वायुसेनाले शनिबार रुसले रातभर एक सय ७८ वटा ड्रोन र दुईवटा ब्यालेस्टिक क्षेप्यास्त्र प्रहार गरेको बताएको छ । यो आक्रमण शाहेद-प्रकारका आक्रमणकारी ड्रोनहरू र हवाई सुरक्षालाई भ्रमित पार्न डिजाइन गरिएका नक्कली ड्रोनहरूको मिश्रण थियो ।

करिब एक सय ३० वटा ड्रोनलाई गोली हानेर खसालिएको थियो भने थप ३८ वटा आफ्नो लक्ष्यको बाटोमा हराएका थिए । रुसले ऊर्जा सुविधाहरूमा आक्रमण गरी ठूलो क्षति पुर्‍याएको युक्रेनको निजी ऊर्जा कम्पनी डिटिइकेले जनाएको छ ।

रुसले ड्निप्रोपेट्रोभस्क र ओडेसा क्षेत्रमा ऊर्जा पूर्वाधारमा प्रहार गरेको डिटिइकेले शनिबार एक विज्ञप्तिमा जनाएको छ । केही बासिन्दा बिजुलीबिना बस्न बाध्य भएका थिए ।

“क्षति उल्लेखनीय छ । ऊर्जा कर्मचारीहरू पहिले नै जमिनमा काम गरिरहेका छन् । हामी घरहरूमा सकेसम्म चाँडो बिजुली बहाल गर्न सम्भव सबै कुरा गरिरहेका छौँ”, ऊर्जा कम्पनीले भन्यो ।

यसैबीच रुसको भोल्गोग्राड क्षेत्रमा गभर्नर आन्द्रेई बोचारोभले ड्रोनको भग्नावशेष खस्दा सहरको क्रास्नोर्मेस्की जिल्लामा लुकोइल तेल प्रशोधन केन्द्र नजिकै आगलागी भएको पुष्टि गर्नुभयो तर थप विवरणहरू प्रदान गर्नुभएन ।

स्थानीय मिडिया आउटलेटहरूले नजिकका विमानस्थलहरूले अस्थायी रूपमा उडानहरू रोकेको बताएका छन् । कुनै हताहत भएको रिपोर्ट गरिएको छैन ।

भोल्गोग्राड रिफाइनरीलाई मस्कोले तीन वर्षअघि युक्रेनमा पूर्ण आक्रमण सुरु गरेदेखि धेरै अवसरहरूमा किएभको सेनाले लक्षित गरेको छ ।