बिना पूर्वाधार होमस्टे सञ्चालन गरिंदा स्याङ्जाका अधिकांश होमस्टे बन्द

नमस्ते चितवन

बुधबार, साउन ०३, २०८० मा प्रकाशित

साउन ३, स्याङ्जा- नेपालको पहिलो होमस्टेको संचालन भएको जिल्लाको रुपमा स्याङ्जा जिल्लालाई चिनिन्छ । स्याङ्जालाई कुनै बेला होमस्टेको राजधानी समेत भनेर चिनिने गर्दथ्यो । तर पछिल्लो समय होमस्टेमा पर्यटकको चहलपहल बिस्तारै घट्दै जान थालेपछी जिल्लाका अधिकांश होमस्टे सुनसान देखिन थालेका छन् ।

त्यसैको उदाहरणको रुपमा गल्याङ नगरपालिकालाई लिन सकिन्छ । पालिकामा सञ्चालित १७ वटा होमस्टे यतिबेला सुनसान बनेका छन् । जिल्लामा बिस्तारै पर्यटकको अभाव खड्किन थालेको छ । स्थानीय तह आएपछी धमाधम गाउँमा होमस्टेको खोलिए । तर प्रभावकारी ढङ्गबाट संचालन हुन नसक्दा गल्याङ नगरपालिकाका होमस्टे बन्द भएका हुन् ।

करीब तीन करोडको लागतमा बनेका होमस्टे बन्द हुँदा राज्यको लगानी त्यसै खेरा गएको छ । होमस्टेमा जान सहज बाटो, खानेपानी, बास बस्नको लागी आवश्यक पूर्वाधार बिना होमस्टे सञ्चालन गरिंदा होमस्टे बन्द भएका हुन् ।

स्थानीय खाना, नेपाली मौलिक संस्कृतिको जगेर्ना होमस्टेले गर्ने गरेको पाईन्छ । तर विना पूर्वाधार होमस्टेको अवधारणाले समस्या भएको हो । होमस्टेका लागि बाटोको सहजीकरण तथा पहुँच नहुँदा बर्खा लागेपछी बाटो हिलाम्य हुने र हिउँदको समयमा धुलाम्य हुने तथा आवश्यक जनशक्तिको अभावमा होमस्टेको महत्वमा दिन प्रतिदिन कमी आउन थालेको बताउनुहुन्छ, गल्याङ नगरपालिका सामाजिक शाखा प्रमुख ढाल बहादुर के.सी. ।

देशमा आएको परिवर्तनसँगै नयाँ उद्देश्य बोकेर युवाहरु बिदेश जाने गरेका कारण त्यसको असर होमस्टेमा पनि पर्न थालेको छ । खर्च गरेर बनेका होमस्टेलाई तत्काल संरक्षण गर्न सकिएन भने जिल्लाका अन्य होमस्टेमा समेत पर्यटक घट्दै जाने र होमस्टे सञ्चालकको रोजिरोटी नै बन्द हुने अवस्था सिर्जना नहोला भन्न सकिंदैन ।