उहाँले भन्नुभयो, “आहरा प्रजाति बढ्दा बाघको सङ्ख्या बढ्ने गर्छ भने अर्कोतर्फ घटेको आहराकै आँकडाले फेरि बाघको वृद्धि सङ्ख्या कमजोेर बनाउन सघाइरहेको हुन्छ, यो प्रकृतिको नियमै हो, जसलाई सन्तुलित पारिस्थितिक प्रणालीका रूपमा हेर्नु पर्छ ।” बाघ बढेका क्षेत्रमा प्रमुख संरक्षण क्षेत्रभन्दा बाहिर ३६ वटा बाघ विचरण गरिरहेको भेटिएको छ । जसले मध्यवर्ती क्षेत्रमा मानव र बाघबिचको द्वन्द्व भविष्यमा उच्च हुने सङ्केत पनि गरेको उहाँहरूले औँल्याउनुभयो । त्यसअघि २०७४ को गणनाले नेपालमा २३५ र २०७४ मा १९८ र त्यसअघि १२१ बाघ रहेको पाइएको थियो ।

अब बाघ व्यवस्थापनमा जोड दिऊँ 

कृषि वन तथा पर्यावरणमन्त्री गीता चौधरीले अब बढेका बाघ व्यवस्थापन गर्नुपर्ने बेला आएको बताउनुभयो । विश्व बाघ दिवसका अवसरमा बाघ गणना नतिजा सार्वजनिक समारोहमा बुधबार बोल्दै मन्त्री चौधरीले भन्नुभयो, “हालको प्राथमिकता बाघको सङ्ख्या वृद्धि मात्र नभई यसको व्यवस्थापन पनि हो, बढ्दो बाघ सङ्ख्यासँगै मानव–बाघ द्वन्द्वका घटना बढेका छन् ।”

सरकारले समस्याग्रस्त बाघको उद्धार, नियन्त्रण र होल्डिङ सेन्टरमा व्यवस्थापन गर्दै, पीडित परिवारलाई राहत उपलब्ध गराउँदै आएको जानकारी दिँदै उहाँले दीर्घकालीन व्यवस्थापनका लागि चिडियाखाना र बाघ संरक्षण क्षेत्रलगायतका विकल्प अध्ययन भइरहेको जानकारी दिनुभयो । कार्यक्रममा मन्त्रालयका सचिव डा. राजेन्द्रप्रसाद मिश्रले गणनाको नयाँ तथ्य अनुसार भविष्यको संरक्षणका लागि नीति र योजनाका लागि थप अध्ययन गर्न निर्देशन दिनुभयो । उहाँले भन्नुभयो, “संरक्षणलाई कसरी देशको आर्थिक वृद्धि र विकाससँग जोड्न सकिन्छ, त्यसतर्फ अघि बढ्ने बेला आएको छ ।”

राष्ट्रिय प्रकृति संरक्षण कोषका सदस्यसचिव डा. चिरञ्जीवी पोखरेलले बाघ संरक्षणलाई बहुआयामिक पक्षबाट नियाल्नुपर्नेमा जोड दिनुभयो । त्यस्तै अन्य संरक्षणकर्मीले बाघ बढेसँगै मानव–बाघ द्वन्द्वको सम्भावना बढेकाले न्यूनीकरणका लागि बेलैमा नयाँ उपाय खोजी गर्नुपर्नेमा जोड दिनुभएको थियो ।