काठमाडौं । चलचित्र ‘चिरञ्जीवी भवः’को पहिलो झलक सार्वजनिक भएको छ । निर्माण टिमले शनिबार चलचित्रका दुईवटा पोस्टर सार्वजनिक गर्दै मुख्य पात्रहरूको लुक्स सार्वजनिक गरेको हो ।
सार्वजनिक पोस्टरमा अभिनेता हरिवंश आचार्य, आशीर्वाद क्षेत्री र प्रशंसा रायमाझीलाई देख्न सकिन्छ । एउटा पोस्टरमा हरिवंश गम्भीर मुद्रामा प्रस्तुत भएका छन् भने आशीर्वाद र प्रशंसा हँसिलो र उत्साहित देखिएका छन् ।
क्याजुअल पहिरनमा रहेका आशीर्वाद कसैलाई हेरेर मुस्कुराइरहेका छन् । बुट्टे चोली र सारीमा सजिएकी प्रशंसाको हँसिलो मुहारले उनको चञ्चल स्वभाव झल्काउँछ । पोस्टरको केन्द्रमा भने सेतै फुलेको कपाल र जुँगा, नयाँ ढाका टोपी तथा आकर्षक पहिरनमा हरिवंश देखिएका छन् । उनको व्यक्तित्वले कुनै खानदानी परिवारको घरमूलीको झल्को दिन्छ । पृष्ठभूमिमा देखिएको मन्दिर र चलचित्रको शीर्षकसँगै राखिएको खामले धार्मिक आस्था तथा समयको भावलाई संकेत गरेको देखिन्छ ।
अर्को पोस्टरमा हरिवंश र आशीर्वादलाई प्रस्तुत गरिएको छ । परम्परागत दौरा सुरुवाल र इस्टकोटमा देखिएका हरिवंशले क्याजुअल पहिरनमा रहेका आशीर्वादलाई आशीर्वाद दिइरहेको दृश्य पोस्टरमा समेटिएको छ । यसले चलचित्रको शीर्षक ‘चिरञ्जीवी भवः’लाई समेत सार्थक बनाउने प्रयास गरेको देखिन्छ । पोस्टर हेर्दा उनीहरू बुवा र छोराको भूमिकामा रहेको अनुमान गर्न सकिन्छ ।
चलचित्रमा हरिवंश आचार्य ‘चिरञ्जीवी बाजे’को भूमिकामा देखिँदैछन् ।
ब्लकबस्टर चलचित्र ‘परान’का निर्देशक दीपकप्रसाद आचार्य ‘काकु’को निर्देशनमा बनेको यो चलचित्र आगामी माघ १ गतेदेखि देशभरका सिनेमा हलमा प्रदर्शनमा आउनेछ । जिग्री इन्टरटेनमेन्ट र प्रिमियर प्रोडक्सनको प्रस्तुतिमा निर्माण भइरहेको चलचित्र हाल पोस्ट प्रोडक्सनको चरणमा छ ।
गत वर्ष निर्देशक आचार्यकै निर्देशनमा बनेको चलचित्र ‘परान’ वर्षकै सर्वाधिक ग्रस कलेक्सन गर्ने नेपाली चलचित्र बनेको थियो । उनको निर्देशनमा बन्न लागेको दोस्रो चलचित्र भएकाले पनि ‘चिरञ्जीवी भवः’लाई दर्शकले प्रतीक्षाका साथ हेरिरहेका छन् ।
चलचित्रको कथा कुमार कट्टेल ‘जिग्री ब्रो’ले तयार पारेका हुन् भने निर्देशन दीपकप्रसाद आचार्यले गरेका छन् । कथाको लेखनमा सविन अधिकारी र वसन्त न्यौपानेले सहकार्य गरेका छन् ।
चलचित्रमा हरिवंश आचार्य, आशीर्वाद क्षेत्री र प्रशंसा रायमाझीसँगै करिश्मा मानन्धर, मिश्री थापा, कमलमणि नेपाल, अभय बराल, सुमन कार्की, सुवर्ण थापा, तुलसी घिमिरे, सरोज अर्याल, हरिस निरौला (कक्रोज), गीता अधिकारी र सुस्मिता कुँवरलगायत कलाकारको अभिनय रहेको छ ।
सोसल ड्रामा विधामा निर्माण भएको ‘चिरञ्जीवी भवः’ले दुई पुस्ताबीचको वैचारिक भिन्नता र उनीहरूबीचको सम्बन्धलाई मुख्य विषयवस्तु बनाएको छ ।
उमेशकुमार बराल र चिरन केसी चलचित्रका निर्माता हुन् भने गजित विष्ट र शैलेश खत्री कार्यकारी निर्माताका रूपमा रहेका छन् ।
चलचित्रका गीतमा निर्देशक दीपक आचार्य स्वयंको शब्द रहेको छ भने हर्क साउदको पनि सहकार्य रहनेछ । यसैगरी रञ्जित गजमेरको संगीतमा समेत चलचित्रमा गीत समावेश गरिएको छ ।
चलचित्रमा शिवराम श्रेष्ठको छायांकन र मित्र डी. गुरुङको सम्पादन रहेको छ । बाबु गिरी, सुशान्त गौतम, निरञ्जन थापा र समीर खरेलले संगीत दिएका छन् । गम्भीर विष्ट र किरण थापाले नृत्य निर्देशन गरेका छन् ।
रामबाबु खड्का प्रमुख सहायक निर्देशक रहेको चलचित्रमा सागर बोहोरा, नेत्रबहादुर राउत र लक्ष्मी पौडेल सहायक निर्देशकका रूपमा छन् । सुवास राज काफ्ले प्रोजेक्ट म्यानेजर तथा विशाल न्यौपाने प्रोडक्सन डिजाइनर रहेका छन् ।
त्यस्तै, मेकअपमा विक्रम गौतम, स्टिल तथा बीटीएसमा सन्तोष क्षेत्री, प्रोडक्सनमा विष्णुप्रसाद मैनाली र अनिश लामिछाने तथा पब्लिसिटी डिजाइनमा टाउवा स्टुडियो (विजय बस्याल) रहेका छन् ।
ओएसआर डिजिटल डिजिटल पार्टनर रहेको चलचित्रलाई रोहित कट्टेल र रत्न श्रेष्ठको आरआर फिल्म्सले देशव्यापी वितरण गर्नेछ । चलचित्र आगामी माघ १ गते (१५ जनवरी) देखि देशभरका हलमा प्रदर्शनमा आउनेछ ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.