पूजा र कविता अनुबन्धित ‘एक्का तीन’मा सुशीलको प्रवेश

नमस्ते चितवन

सोमबार, कार्तिक १६, २०८३ मा प्रकाशित

काठमाडौं ,कार्तिक १६
मंसिरको पहिलो साताबाट छायांकन सुरु गर्ने तयारीमा रहेको फिल्म ‘एक्का तीन’मा अभिनेता सुशील श्रेष्ठ अनुबन्धित भएका छन् । निर्माण पक्ष र सुशीलबीच फिल्मका लागि औपचारिक सम्झौता भइसकेको छ ।

हाल फिल्म ‘साम्राज्य’को छायांकनमा व्यस्त सुशीलले मंसिरको पहिलो साताबाट ‘एक्का तीन’को छायांकनमा सहभागी हुनेछन् । नेपाली फिल्ममा एक्सन अभिनेताको पहिचान बनाएका सुशीलको प्रवेशले फिल्मको कलाकार टोली थप बलियो बनेको छ ।

रुपेश तामाङको निर्देशनमा निर्माण हुन लागेको फिल्ममा अभिनेत्री पूजा शर्मा र कविता नेपाली यसअघि नै अनुबन्धित भइसकेका छन् । एक्सनमा समेत आफ्नो क्षमता देखाइसकेका यी तीन कलाकारको सहकार्यले फिल्मप्रति दर्शकको चासो बढाउने देखिन्छ ।

सुमन गजमेरको कथा रहेको फिल्मलाई जुना फिल्मस्ले निर्माण गर्न लागेको हो ।

यद्यपि, फिल्ममा सुशीलको जोडीका रूपमा पूजा शर्मा र कविता नेपालीमध्ये को रहनेछिन् भन्नेबारे निर्माण पक्षले अहिलेसम्म केही जानकारी दिएको छैन । त्यसैले ‘एक्का तीन’मा सुशीलको जोडी को बन्लिन् भन्ने कौतुहलता बढेको छ ।