‘पाँच पाण्डव’को कथा, पटकथा तथा संवाद सुशील पौडेलले लेखेका हुन्। लेखक पौडेलका अनुसार यो चलचित्र सोसल ड्रामा विधामा आधारित छ। महाभारतका पाँच पाण्डवका चरित्र र विम्बलाई प्रयोग गर्दै समकालीन नेपाली समाजको कथा प्रस्तुत गर्नु चलचित्रको मुख्य विशेषता रहेको उनले बताएका छन्।

चलचित्रलाई श्याम तामाङले छायांकन गरेका छन् भने सुप्रिम पराजुलीले सम्पादन गरेका छन्। चलचित्रको द्वन्द्व निर्देशन सम्राट बस्नेतले गरेका छन्। गम्भीर विष्ट र विक्रम स्वाँरको कोरियोग्राफी रहेको चलचित्रमा दर्शकले डल्बी एटमस साउन्डको अनुभव गर्न पाउनेछन्।

चलचित्रमा अर्जुन पोखरेलको संगीत, उत्तम न्यौपानेको साउन्ड डिजाइन, सुजिल कर्माचार्यको ब्याकग्राउन्ड म्युजिक (बीजीएम), पुकार धिमालको भीएफएक्स, रोहित राज गौतमको एचओपी र विष्णु बुढाथोकीको प्रोडक्सन म्यानेजमेन्ट रहेको छ।

तिहारको अवसर पारेर कात्तिक २० गते (नोभेम्बर ६) देखि प्रदर्शनमा आउने चलचित्रको डिजिटल पार्टनर ओएसआर डिजिटल रहेको छ। चलचित्रलाई रोहित कट्टेल र रत्न श्रेष्ठको आरआर फिल्म्सले देशव्यापी वितरण गर्नेछ।