पत्रकार चौधरीले २०७२ सालदेखि स्वर्गीय श्रेष्ठका बारेमा खोजगरी निरन्तर लेख, रचना पत्रपत्रिकामा प्रकाशन गर्दै आउनुभएको छ । नेपाल पत्रकार महासंघको इतिहासलाई पुनःलेखनको माग गर्दै सार्वजनिक बहस र विमर्श गर्दै आउनुभएका पत्रकार चौधरीको योगदानको कदर गरी सो पुरस्कार प्रदान गर्ने निर्णय गरिएको दबूले जनाएको छ । पत्रकार चौधरीले संस्थापक विषयमा प्रेस काउन्सिल नेपालको मुखपत्र संहिताको २०७२ पुसमा प्रकाशित अङ्कमा लेख प्रकाशन गर्नुभएको थियो ।

त्यस्तै, प्रेस चौतारी नेपालले २०७३ सालमा प्रकाशित गरेको मुखपत्र ‘चौतारी’ मा पनि उहाँले ‘नेपाली पत्रकारिताको बहस र यथार्थ’ शीर्षकमा लामो लेख लेख्नुभएको थियो । नेपाल आदिवासी जनजाति पत्रकार महासंघ (फोनिज) बाट हालै प्रकाशित सत्यनारायणबहादुर श्रेष्ठ विशेषाङ्कमा पनि पत्रकार चौधरीले संस्थापक बारेमा रचनात्मक आलेख प्रकाशन गर्नुभएको छ ।

त्यससँगै उहाँले विभिन्न सार्वजनिक कार्यक्रममा संस्थापक विषयमा बहस गर्दै आउनुभएको छ । गोरखापत्र दैनिकमा २०६६ माघ २७ देखि कार्यरत उपसम्पादक चौधरी नियमित रुपमा सिर्जनात्मक लेख रचनाहरु प्रकाशन गर्दै आउनुभएको छ । चौधरी नेपाल आदिबासी जनजाति पत्रकार महासंघ (फोनिज) को वरिष्ठ उपाध्यक्ष हुनुहुन्छ ।