काठमाडौं । नेपाल प्रिमियर लिग (एनपीएल) अन्तर्गत बिहीबार सम्पन्न खेलमा काठमाडौं गोर्खाजले विराटनगर किंग्सलाई ९ विकेटले पराजित गरेको छ ।कीर्तिपुरस्थित त्रिवि अन्तर्राष्ट्रिय क्रिकेट मैदानमा विराटनगरले दिएको ८४ रनको सामान्य लक्ष्य काठमाडौंले ९.४ ओभरमै १ विकेट गुमाएर पूरा गर्यो ।
काठमाडौंको जितमा अस्ट्रेलियन स्टार डेभिड वार्नरले आक्रामक ब्याटिङ गर्दै अविजित ४४ रन बनाए । उनले २४ बलमा २ चौका र ३ छक्का प्रहार गरे । अर्का अस्ट्रेलियन खेलाडी विलियम बोसिस्टोले २४ बलमा ३ चौकासहित अविजित २३ रन जोडे ।
दोस्रो विकेटका लागि वार्नर र बोसिस्टोले अविजित ७९ रनको साझेदारी गर्दै टोलीलाई सहज जित दिलाए । ओपनर साहिल पटेल १० रन बनाएर आउट भए । विराटनगरका लागि अपराजित पौडेलले एक विकेट लिए ।
त्यसअघि टस हारेर पहिले ब्याटिङ गरेको विराटनगर किंग्स १९.३ ओभरमा ८३ रनमै अलआउट भएको थियो ।
विराटनगरका लागि नवौँ नम्बरमा ब्याटिङ गर्न आएका रुपेश सिंहले सर्वाधिक २६ रन बनाए । उनले २७ बलमा ३ चौका र १ छक्का प्रहार गरे । एन्जेलो म्याथ्युजले २२ र बसिर अहमदले १० रन बनाए । यी तीनबाहेक अन्य ब्याटरले दोहोरो अंकमा रन बनाउन सकेनन् ।
शेहान जायसूर्याले ५, लोकेश बमले ६, आन्द्रे रसेलले ३ र अपराजित पौडेलले २ रन बनाए । इमरान शेख, नारायण जोशी र शुभम रन्जाने खाता नखोली आउट भए । कप्तान सन्दीप लामिछाने ३ रनमा अविजित रहे ।
विराटनगरको इनिङ्समा आठौँ विकेटका लागि म्याथ्युज र रुपेशले गरेको ३९ रनको साझेदारी नै सबैभन्दा ठूलो साझेदारी बन्यो ।
काठमाडौंका युवा लेग स्पिनर सन्तोष यादवले उत्कृष्ट बलिङ गर्दै ३ ओभरमा ११ रन खर्चेर ३ विकेट लिए । सहान अराचिगे र जहानदान खानले समान २ विकेट हात पारे । कप्तान करण केसी, शाहब आलम र देव शाहले समान १ विकेट लिए ।
पहिलो खेलमा हार बेहोरेको काठमाडौंको यो लगातार दोस्रो जित हो । यससँगै तीन खेलबाट ४ अंक जोडेको काठमाडौं अंकतालिकाको दोस्रो स्थानमा उक्लिएको छ । पाँच खेल खेलेको विराटनगरको भने यो तेस्रो हार हो । समान ४ अंक रहे पनि नेट रनरेटका आधारमा विराटनगर पाँचौँ स्थानमा झरेको छ ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.