प्रवक्ता खरेलले प्रेस तथा अभिव्यक्ति स्वतन्त्रता, विधिको शासन र मानवअधिकारको पक्षमा पार्टी दृढ रहेको बताउँदै पत्रकारमाथि भएको व्यवहारको निष्पक्ष छानबिन हुनुपर्ने माग गरे ।

“सञ्चारकर्मीमाथि सोधपुछ गर्ने नाममा समाचार कक्षमै प्रवेश गरेर धरपकड गरियो, त्यो सर्वथा गलत र भर्त्सनायोग्य छ,” उनले भने, “प्रधानमन्त्री कार्यालयले यसमा आफ्नो संलग्नता नरहेको बताए पनि घटना किन भयो र कसले गराएको हो भन्ने विषयमा तत्काल उच्चस्तरीय छानबिन हुनुपर्छ ।”

रास्वपाले सञ्चारगृहमा भएको सोधपुछ तथा पक्राउ प्रकरणमा संलग्न जोकोहीलाई पनि छानबिनको दायरामा ल्याई दोषी देखिए कारबाही गर्न सरकारलाई निर्देशन दिएको छ ।

“घटनाको छानबिन गरी दोषीमाथि कारबाही गर्न कुनै ढिलासुस्ती हुनु हुँदैन । शीघ्रातिशीघ्र छानबिन गरेर परिणाम देखाउन सरकारलाई यो बैठक निर्देशन दिन्छ,” प्रवक्ता खरेलले भने ।

रास्वपाले सामाजिक लोकतन्त्रको मूल मर्म प्रेस स्वतन्त्रता र विधिको शासन रहेको उल्लेख गर्दै राज्यका संयन्त्रहरूबाट हुने अधिकारको दुरुपयोगविरुद्ध खबरदारी जारी राख्ने जनाएको छ ।