बिजनेस भिसाका लागि अध्यागमन धाउन नपर्ने

नमस्ते चितवन

शनिबार, माघ ०६, २०८० मा प्रकाशित

अब बिजनेस भिसाका लागि अध्यागमन विभाग धाउन नपर्ने भएको छ। अध्यागमन कार्यालयका महानिर्देशक रूद्रसिंह तामाङका अनुसार अब विभागले उद्योग विभाग अन्तर्गतको एकल विन्दु सेवा केन्द्रबाटै सेवाग्राहीले बिजनेस भिसा प्राप्त गर्ने व्यवस्था मिलाइएको हो।

बिजनेस भिसामा जानेहरूले उद्योग विभागमा इन्ट्री गरेपछि त्यहीँबाट अनलाइनमार्फत अध्यागमन कार्यालयले विवरण प्राप्त गर्ने र डकुमेन्टका आधारमा अनलाइनबाटै भिसा जारी हुने व्यवस्था गरिएको महानिर्देशक तामाङले जानकारी दिएका छन्।

यो सेवा माघ २ गतेदेखि नै सुरू भएको र यसले विभागमा इन्ट्री गरेपछि अध्यागमन गएर स्वीकृत गरी फेरि विभागमै जानुपर्ने अवस्थाको अन्त्य भएको छ। अब डकुमेन्ट भेरिफाइ गर्नुपरेको खण्डमा मात्र अध्यागमन कार्यालय जानुपर्ने महानिर्देशक तामाङले भने ।

विभागले चाँडै अनलाइन भुक्तानीको सुविधा पनि ल्याउन लागेको छ। त्यसका लागि मोबाइल एप्स बनाउने काम पनि अन्तिम चरणमा रहेको महानिर्देशक तामाङले बताएका छन्।

अनलाइन भुक्तानीको प्रयोग सफल रहेमा नेपालमा पनि इ(भिसा सुरू गरिने छ। यसले नेपाल घुम्न आउने विदेशीहरूलाई धेरै सहज हुनेछ। यसबाट नेपाल आउने पर्यटकको संख्या वृद्धि गर्न पनि सघाउन पुग्ने महानिर्देशक तामाङले बताएका छन्।