वैशाख ५,काठमाडौं : नेकपा (माओवादी केन्द्र)का अध्यक्ष पुष्पकमल दाहालले आसन्न स्थानीय तह निर्वाचनमा दुई गठबन्धनबीच प्रतिस्पर्धा हुन लागेकाे बताएका छन्।
सोमबार नेकपा (माओवादी केन्द्र)को केन्द्रीय प्रचार तथा प्रकाशन विभागले आयोजना गरेको पत्रकार भेटघाट कार्यक्रममा बोल्दै प्रचण्डले आसन्न स्थानीय तह निर्वाचनमा दुई गठबन्धनका बीच प्रतिस्पर्धा हुने बताएका हुन्।
उनले भने, ‘अझैपनि संघीय लोकतान्त्रिक गणतन्त्र, समावेशी, समानुपातिक प्रणाली र धर्म निरपेक्षतालाई कुनै न कुनै रुपले उल्ट्याउन चाहाने प्रवृत्ति देखा परेको छ। एउटा प्रवृत्ति जो हिजोका सामन्त राजा, महाराजा र ऊ सँग सम्बन्धित पार्टीहरूसँग गठबन्धन गर्न खोज्ने र अर्को संघीय लोकतान्त्रिक गणतन्त्र, संविधान र राष्ट्रियताको रक्षा गर्न खोज्नेहरूको गठबन्धन।’
‘तपाई, हामीले देखेका छौँ दुईवटा गठबन्धन, तपाई गठबन्धनका पार्टीहरूका अनुहार राम्रोसँग हेर्नुभयो भने कुन गठबन्धन लोकतन्त्रवादी, परिवर्तनकारी, संघीय लोकतान्त्रिक गणतन्त्रको पक्षधरकाे गठबन्धन हो र कुन त्यसलाई उल्ट्याउन खोज्नेहरुकाे हो भन्नेकुरा प्रष्टै देखिन्छ’ प्रचण्डको भनाइ छ।
गठबन्धनका साझा उम्मेदवार तय गर्दा कतिपय असन्तुष्टिहरू आउनु सामान्य रहेको भन्दै उनले पार्टी र गठबन्धनले संस्थागत निर्णय गरेपछि सबै पार्टी पंक्ति संस्थागत निर्णयको पक्षमा उभिने बताए। ‘महानगरपालिका र उपमहानगरपालिकालाई केन्द्रले नै टुंग्याउने भन्ने नै नीति भएको हुनाले हामी केन्द्रमा टुङ्ग्याउँदै छौँ।
अरु नगरपालिका र गाउँपालिकाको हकमा तल्ला कमिटीहरूलाई नै अधिकार प्रत्यायोजन गरिएको र कहीँ समस्या पर्यो भने उनीहरुले केन्द्रलाई रिपोर्ट गरे भने केन्द्रले त्यहाँ सहयोग गर्ने भनेको हुनाले त्यही नीति अन्तर्गत नै हामी अगाडि बढ्दै छौँ’, उनले भने, ‘एउटै पार्टी भित्र पनि कसैले टिकट पाउने, कसैले नपाउने हुन्छ। नपाउने मध्ये कतिपय असन्तुष्ट हुने, बागी उठ्ने गरेका त विगतका हामीले अनुभव गरेकै छौँ।’
उनले भरतपुर महानगरपालिका आफूहरुलाई नै चाहिन्छ भनेर दाबी नगरेको बताए। गठबन्धनमा महानगरपालिका भागबण्डा लगाउँदा आफूहरुलाई जुन दिएपनि स्वीकार्य हुने उनको भनाइ छ।
६ वटा महानगरपालिका मध्ये ३ वटा नेपाली कांग्रेसलाई र बाँकी ३ वटामा माओवादी केन्द्र, जनता समाजवादी पार्टी र नेकपा(एकीकृत समाजवादी) पार्टीलाई एक/एक वटा बाँड्ने गरी छलफल भइरहेको बताए।निर्धारित समयमै निर्वाचन हुने उल्लेख गर्दै उनले नेत्रविक्रम चन्द विप्लव नेतृत्वको नेकपालाई देखाएर निर्वाचन नरोकिने स्पष्ट पारे।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.