काठमाडौं । नेपाली कथानक चलचित्र ‘गौँथली’ले फ्रान्समा आयोजना हुने ‘वर्ल्ड फिल्म फेस्टिभल इन कान्स’मा ‘बेस्ट फरेन सिनेमा’ अवार्ड जितेको छ। यस उपलब्धिलाई चलचित्रका निर्देशक र निर्माताले ‘गौँथली’को अन्तर्राष्ट्रिय यात्राको महत्त्वपूर्ण सफलता बताएका छन्।
‘वर्ल्ड फिल्म फेस्टिभल इन कान्स’लाई ‘रिमेम्बर द फ्युचर’ नामले पनि चिनिन्छ। फ्रान्सको कान्समा आयोजना हुने यस फेस्टिभलमा मासिक रूपमा अनलाइनमार्फत चलचित्रहरू सहभागी गराइन्छन् भने मासिक तथा वार्षिक रूपमा भौतिक प्रदर्शन, रेड कार्पेट र अवार्ड समारोहसमेत आयोजना हुने गरेको छ।
चलचित्रले अन्तर्राष्ट्रिय अवार्ड जितेपछि निर्देशक डा. कपिल रिजालले खुसी व्यक्त गरेका छन्। २५ वर्षअघि उनका बुवा डा. भोला रिजालले निर्माण गरेको गीतिचलचित्र ‘गौँथली’को भावना, माया र विरासतलाई नयाँ पुस्तासम्म नयाँ शैलीमा पुर्याउने प्रयास गरेको उनले बताएका छन्।
“आज मन गर्वले भरिएको छ, अनि आँखामा खुसीका आँसु छन्। २५ वर्षअघि मेरा बुवा डा. भोला रिजालले निर्माण गर्नुभएको गीतिचलचित्र ‘गौँथली’को त्यही भाव, त्यही माया र त्यही विरासतलाई आत्मसात् गर्दै मैले नयाँ पुस्तासम्म नयाँ ढंगले पुर्याउने एउटा सानो प्रयास मात्र गरेको हुँ,” निर्देशक रिजालले भनेका छन्।
उनले ‘गौँथली’ले प्राप्त गरेको माया, साथ र सफलताले आफूलाई भावुक बनाएको उल्लेख गर्दै चलचित्र भावना, सपना र नेपाली चलचित्रप्रतिको प्रेमसँग जोडिएको सुन्दर यात्रा भएको बताएका छन्। यो उपलब्धि व्यक्तिगत सफलतामात्र नभई सम्पूर्ण चलचित्र टोलीको जित भएको उनको भनाइ छ।
निर्माता सुमन गिरीले पनि चलचित्रले अन्तर्राष्ट्रिय स्तरमा सफलता हासिल गरेकोमा खुसी व्यक्त गरेका छन्। दर्शकको माया, साथ र आशीर्वादकै कारण ‘गौँथली’ कान्ससम्म पुगेर विजेता बन्न सफल भएको उनले बताएका छन्।
“हिजो एउटा सपना थियो, आज त्यो सपना गौरवपूर्ण इतिहास बनेको छ,” निर्माता गिरीले भनेका छन्। उनले चलचित्रले प्राप्त गरेको सफलतालाई नेपाली चलचित्र र नेपाली माटोको जितका रूपमा व्याख्या गरेका छन्।
डा. कपिल रिजालको निर्देशनमा बनेको ‘गौँथली’ अहिले पनि प्रदर्शनरत छ। प्रदर्शनको सय दिन मनाइसकेको चलचित्रले २६ करोड रुपैयाँभन्दा बढी व्यापार गरेको जनाइएको छ। यससँगै चलचित्र नेपाली फिल्म उद्योगमा सर्वाधिक कमाइ गर्ने चलचित्रमध्ये दोस्रो स्थानमा रहेको दाबी गरिएको छ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.