काठमाडौं । अभिनेता जितु नेपाल आगामी कात्तिक २० गतेदेखि प्रदर्शनमा आउने चलचित्र ‘पाँच पाण्डव’मा भीमसेनको चरित्रमा देखिँदैछन् । चलचित्रको ट्रेलरमा अभिनेता हरिवंश आचार्यले उनलाई ‘भीम’ भनेर सम्बोधन गर्दा जितुले ‘म त भीमसेन हो’ भनेको दृश्यले दर्शकमाझ चासो बढाएको छ ।
महाभारतमा भीम पाँच पाण्डवमध्ये सबैभन्दा बलिया पात्रका रूपमा परिचित छन् । यस्तो शक्तिशाली पात्रको भूमिकामा जितु देखिएपछि उनको चरित्रलाई लिएर विभिन्न चर्चा पनि भइरहेका छन् । तर, जितु भने आफू पूर्ण रूपमा भीम नभएको बताउँछन् ।
‘भीम भन्दा सबैले ठूलो चरित्रलाई बुझ्छन् । तर, फिल्ममा मेरो चरित्र पनि रमाइलो छ । यो ठ्याक्कै पाँच पाण्डवको कथा होइन । स्वर्गमा रहेका युधिष्ठिर दाजुभाइबिना दुःखी हुनुहुन्छ । उहाँलाई आफ्ना चार भाइको सम्झना आउँछ । ५१ सय वर्षपछि पनि कुनै न कुनै रूपमा भाइहरू जन्मिएका होलान् भन्ने सोचेर खोज्दै नेपाल आउनुहुन्छ । त्यसपछि हामीलाई भेटेर तँ भीम होस्, तँ अर्जुन होस् भनेर चिनाउनुहुन्छ । मैले आफैं भीम हुँ भनेको होइन,’ जितुले भने ।
आफूलाई भीमको सानो स्वरूपमा प्रस्तुत गरिएको भन्दै कतिपयले टिप्पणी गरेको प्रसंगमा उनले भीम सानो हुनै नहुने भन्ने नरहेको प्रतिक्रिया दिए ।
‘कसैले भीम सानो हुनुभयो पनि भने । तर, भीम सानै हुन नपाउने भन्ने त होइन नि,’ उनले भने ।
जितुका अनुसार चलचित्रमा उनी इँटाभट्टामा काम गर्ने मजदुरको भूमिकामा छन् । त्यसैले भीमको चरित्रका लागि छुट्टै ठूलो तयारी गर्नुपर्ने अवस्था नरहेको उनको भनाइ छ ।
‘म पूर्ण रूपमा भीम होइन । हामी पाण्डवको एउटा अंश मात्र हौं । कल्पनामा कसैले कनेक्ट गर्यो भने एउटा कुरा हो । म फिल्ममा इँटाभट्टाको मजदुर हुँ । त्यसकारण निर्देशकको निर्देशन र कथाले मागेअनुसार काम गरेको छु,’ उनले स्पष्ट पारे ।
महाभारत र पाँच पाण्डवको विम्बमा आधारित चलचित्रमा काम गर्न पाउँदा आफू खुसी रहेको जितु बताउँछन् । उनका अनुसार यस चलचित्रमा काम गर्दा तीनवटा कुरा उनका लागि नयाँ चुनौती बने ।
पहिलो चुनौती अभिनेत्री दीपाश्री निरौला थिइन् । चलचित्रमा जितु र दीपाश्री श्रीमान्–श्रीमतीको भूमिकामा छन् । यसअघि विज्ञापनमा सँगै काम गरे पनि चलचित्रमा भीमसेनकी श्रीमतीको भूमिकामा दीपाश्रीलाई देख्नु उनका लागि फरक अनुभव रहेको उनले बताए ।
त्यस्तै, अभिनेता हरिवंश आचार्यसँग पहिलोपटक स्क्रिन शेयर गर्न पाउनु पनि उनका लागि विशेष अनुभव बनेको छ । युधिष्ठिरको भूमिकामा रहेका हरिवंशसँगको दृश्यमा आफूलाई फरक अनुभव भएको जितुको भनाइ छ ।
‘पाँच पाण्डव’मा धेरै कलाकार र ठूलो क्यानभास भएकाले आफूलाई दर्शकमाझ कसरी प्रस्तुत गर्ने र कुन रूपमा सम्झिनेछन् भन्ने अर्को चुनौती रहेको उनले बताए ।
जितु नेपाललाई दर्शकले प्रायः हास्य भूमिकामा हेर्न रुचाउँछन् । यो चलचित्रमा पनि दर्शकको उक्त अपेक्षा केही हदसम्म पूरा हुने उनको भनाइ छ ।
‘दर्शकको कमेडी हेर्ने चाहना हल्का रूपमा पूरा हुन्छ । किनभने यो एउटै मान्छेको कथा होइन, पाँच जना भाइको कथा हो । हरेक कलाकारका आ–आफ्नै पाटा र कथा छन् । कथाले मागेको र दृश्यले आवश्यक ठानेको ठाउँमा कमेडी छ,’ जितुले भने ।
निर्देशक बसन्त निरौलासँग जितुले यसअघि चलचित्र ‘ज्वाइँ साब’मा काम गरिसकेका छन् । लेखक सुशील पौडेलसँग पनि उनको पुरानै चिनजान छ भने प्रस्तुतकर्ता नवीन श्रेष्ठसँग चलचित्र ‘लाज शरणम्’ निर्माणका क्रममा चिनजान भएको थियो । निरन्तर भेटघाट भइरहने क्रममा चलचित्रमा काम गर्ने प्रस्ताव आएको र पाँच पाण्डवमध्ये एक पात्रका रूपमा आफू जोडिएको उनले बताए ।
बसन्त निरौलाको निर्देशनमा बनेको चलचित्र ‘पाँच पाण्डव’मा जितुसँगै हरिवंश आचार्य, महेश त्रिपाठी, दीपाश्री निरौला, विनोद न्यौपाने, आर्यन सिग्देल, सुशील सिटौला र इभा गिरीलगायत कलाकारको मुख्य भूमिका छ ।
काली रानी फिल्मस्को ब्यानरमा निर्माण भएको चलचित्रकी निर्माता काली रानी श्रेष्ठ हुन् भने नवीन श्रेष्ठ प्रस्तुतकर्ता रहेका छन् । चलचित्रको कथा, पटकथा तथा संवाद सुशील पौडेलले लेखेका हुन् । सामाजिक कथावस्तुमा आधारित चलचित्रले महाभारतका पाँच पाण्डवका चरित्र र विम्बमार्फत समकालीन नेपाली समाजको कथा प्रस्तुत गर्ने निर्माण पक्षले जनाएको छ ।
श्याम तामाङको छायांकन, सुप्रिम पराजुलीको सम्पादन र सम्राट बस्नेतको द्वन्द्व निर्देशन रहेको चलचित्रमा गम्भीर विष्ट र विक्रम स्वाँरको कोरियोग्राफी छ । चलचित्रमा अर्जुन पोखरेलको संगीत, उत्तम न्यौपानेको साउन्ड डिजाइन, सुजिल कर्माचार्यको ब्याकग्राउन्ड म्युजिक र पुकार धिमालको भिएफएक्स रहेको छ ।
चलचित्रलाई डल्बी एटमस साउन्डमा तयार गरिएको छ । ओएसआर डिजिटल डिजिटल पार्टनर रहेको चलचित्रलाई आरआर फिल्म्सले देशव्यापी वितरण गर्दैछ ।
सम्बन्धित समाचार
लोकप्रिय
-
१.
-
२.
-
३.
-
४.
-
५.
-
६.
भर्खरै
-
१.
-
२.
-
३.
-
४.
-
५.
-
६.
-
७.
-
८.