आयोजनाका उपनिर्देशक पन्थीले यो सुरुङमार्ग उपयोग गरेबापत अपेक्षित रूपमा दस्तुर सङ्कलन भइरहेको बताउनुभयो । उहाँका अनुसार पहिलो दिन ११ लाख ८० हजार रुपियाँ र दोस्रो दिन १२ लाख ५० हजार रुपियाँ सडक उपयोग दस्तुर सङ्कलन भएको हो ।

जाम हटाउन के गर्ने ?

प्रतिनिधि सभा अन्तर्गतको पूर्वाधार विकास समितिका सभापति तथा यातायात पूर्वाधारविज्ञ आशिष गजुरेलले नागढुङ्गा सुरुङमार्गको टोल बुथमा देखिएको सवारीसाधनको जामलाई हटाउन सडक उपयोग दस्तुर सङ्कलनलाई पूर्ण रूपमा नगदरहित (क्यास लेस) बनाउनुपर्ने सुझाव दिनुभयो । रेडियो फ्रिक्वेन्सी आइडेन्टिफिकेसन (आरएफआइडी) र ‘एन–ट्याग’ प्रणालीलाई पूर्ण रूपमा कार्यान्वयन गर्नुपर्ने पनि उहाँले बताउनुभयो ।

सडक बोर्ड र सम्बन्धित बैङ्कको सर्भरमा रहेको प्राविधिक समस्या तुरुन्त समाधान गरी सवारीसाधनमा ‘एन–ट्याग’ वितरण गर्ने र बिनाअवरोध गाडी हुइँकन सक्ने ‘फास्ट–ट्र्याक’ टोल लेन सञ्चालनमा ल्याउनुपर्ने उहाँले बताउनुभयो । त्यसै गरी डिजिटल भुक्तानीलाई प्रभावकारी बनाउनुपर्ने आवश्यकता देखिएको छ । क्युआर कोडलाई थप द्रुत बनाउने तथा अनलाइन वालेट वा प्रिपेड कार्डको प्रयोग बढाएर म्यानुअल नगद लेनदेनलाई न्यून गर्दै जानुपर्ने देखिन्छ । प्रविधिका साथै टोल बुथ सङ्ख्या र जनशक्ति थप्नुपर्ने आवश्यक देखिएको छ । बढ्दै गएको सवारी चापलाई ध्यानमा राख्दै टोल बुथका काउन्टर सङ्ख्या बढाउने र थप प्रशिक्षित कर्मचारी खटाएर सेवा प्रवाह छिटो बनाउनुपर्ने आवश्यकता देखिएको छ ।

सुरुङमार्ग आयोजनाले मात्र नभई सम्बन्धित सवारीचालक पनि चनाखो हुनुपर्ने हुन्छ । चालकले सुरुङ प्रवेश गर्नुअघि नै आवश्यक खुद्रा रकम वा डिजिटल भुक्तानीको तयारी गर्न सूचना प्रवाह गर्नुपर्ने आवश्यकता देखिएको हो ।